Ҳамма ривожланган давлатда, илғор жамиятда яшашни истайди. Лекин тараққиётнинг оила институга таъсирини ҳеч ким қабул қилолмайди. Технологик ва иқтисодий тараққий этган мамлакат ўрта асрлар тартибида яшай олмайди. Келинг, бунинг сабабларини обдон кўздан кечирайлик.

Аёлларнинг иқтисодий мустақиллиги ортиб бормоқда. Молиявий жиҳатдан мустақил инсонлар носоғлом никоҳда қолишни истамайди. Ўзини боқолса, болаларини уддаласа – хиёнаткор ёки уронғич эрга, ўта худбин эр уруғига сабр қилишга не ҳожат? Аёлларни уйга қамаб, ишдан тўсилса,  жамиятнинг ярми ўлик, иқтисодиёт тўлиқ қарам бўлиб қолади. Қўпол қилиб айтганда, эркак кишига икки жуфт тўшак етарли бўлса, аёл киши шу чойшаблар сони тўртта бўлишини истайди. Бундай рўзғор камчиликларини ишловчи аёл ўзи қаршилайверади. Шундай экан, аёлни ишга жойлаш иқтисодий мустақиллик дегани, лекин уни уйда қамаш мамлакат иқтисодиётига жиддий зарар беради.

Таълим даражаси ошиб эр-хотиннинг ҳуқуқ ва мажбуриятлари ҳақидаги хабардорлик ўсяпти. Шаҳарлашув ва модернизация – анъанавий оила моделлари ўзгариб, шахсий эркинликка эътибор кучаяди. Анъанавий оилада келиннинг роли ўша-ўша. Қайнларнинг уйида ҳатто ўзи истагандек эмин-эркин кийинолмайдиган ёш аёлдан тўлиқ итоат кутиш зулмдек қаршиланади.

Ахборот технологиялари ва ижтимоий тармоқлар – янги танишувлар, муносабатларга бўлган талаблар ўзгариб ва таққослаш маданияти кучайди. Аёлнинг қўлидан телефонни тортиб олиш инсон ҳуқуқларига зид. Эркакнинг яширин ёзишмаларини ўқиш эса унинг шахсий чегараларини бузади.

Умуман олганда, ҳозир инсонлар ўз руҳий саломатлиги ва ҳаёт сифатига кўпроқ аҳамият бера бошлади. Суймаганга суйкалиб яшашдан ёлғизлик афзал кўрилиши муикин.

Мана шу ҳол – ривожланишнинг оғир бадали. Афсуски, биз идеал утопияда яшамаймиз. Тараққиёт кўп ҳоларда одамларнинг ёлғизланишини тақазо қилади.