Наманган шаҳрида мактаб директорлари йиғилишда саҳнага чиқарилиб, кўпчилик олдида изза қилингани ва жиноий жавобгарлик билан қўрқитилгани ҳақида Элтузарга мурожаат келиб тушди. Унда шаҳар ички ишлар бошқармаси бошлиғи Илҳомжон Сотволдиевнинг хатти-ҳаракатларини текшириш сўралган.

Мурожаатга кўра, 2026 йил 20 октябрь куни соат 11:00 да Наманган шаҳар ҳокимлигининг катта мажлислар залида вояга етмаганлар ўртасида жиноятчилик ва ҳуқуқбузарликларнинг олдини олишга бағишланган йиғилиш ўтказилган. Уни шаҳар ҳокими олиб борган.

Муаллифнинг билдиришича, сўз берилган И.Сотволдиев ўқувчилари жиноят содир этгани айтилган мактабларнинг директорларини саҳнага чиқарган. Маҳалла раислари, ҳоким ёрдамчилари, солиқ инспекторлари ва ёшлар етакчилари иштирокида уларга дағдаға қилган, саволларига жавоб бериш имконини бермаган.

«Барчангни жиноий жавобгарликка тортаман», – деган у, мурожаатда келтирилишича.

«Ўқувчи тунги вақтда жиноят содир этса, нега мактаб директори жавоб бериши керак?» – дея савол қўяди мурожаат муаллифи. У профилактика инспекторлари, маҳалла масъуллари ва ота-оналарнинг вазифалари ҳам эътиборга олиниши лозимлигини таъкидлаган.

Мурожаатда мактабларга бириктирилган инспектор-психологлар фаолиятига ҳам эътироз билдирилган. Муаллифнинг даъвосича, улар Миллий гвардия тизимида бўлган пайтда ўқувчилар билан профилактик суҳбатлар ўтказиб, айримларининг хонадонларига борган. Ички ишлар тизимига ўтказилганидан кейин эса кундузги ва тунги навбатчиликларга жалб қилиниб, мактаблардаги иштироки камайган.

Мурожаат муаллифи педагогларга нисбатан асоссиз айбловларга йўл қўймасликни, ҳар бир ҳолатни аниқ далиллар асосида ўрганишни сўраган. Шунингдек, Наманган вилояти ички ишлар бошқармаси раҳбариятидан И.Сотволдиевнинг хатти-ҳаракатларига ҳуқуқий баҳо беришни талаб қилган.