Ўзбекистон Республикасининг 2026 йил 22 июнда қабул қилинган ЎРҚ–1155-сонли Қонуни билан айрим қонун ҳужжатларига қўшимча ва ўзгартиришлар киритилди.

Унга кўра, шу вақтгача мавжуд бўлмаган Жиноят кодексида коррупцияга оид жиноятларнинг аниқ рўйхати белгиланди. Шунингдек, коррупция билан боғлиқ айрим жиноятлар учун жавобгарлик чоралари кучайтирилди.

Қонунга мувофиқ, ўзлаштириш ёки растрата қилиш йўли билан талон-торож қилиш ҳамда фирибгарлик учун ҳукм қилинган, жиноят натижасида етказилган зарарни тўлиқ қопламаган шахсларга жазодан муддатидан илгари шартли равишда озод қилиш тартиби қўлланилмайди.

Маъмурий жавобгарлик тўғрисидаги кодексга киритилган ўзгартиришларга асосан, давлат харидларида бошланғич нарх ва бозор нархи ўртасидаги йўл қўйиладиган тафовут бўйича белгиланган талабларни бузган мансабдор шахсларга БҲМнинг 30 бараваригача жарима қўлланилиши мумкин.

Шу билан бирга, “Коррупцияга қарши курашиш тўғрисида”ги Қонунга мувофиқ Қорақалпоғистон Республикаси, вилоятлар ва Тошкент шаҳрида коррупцияга қарши курашиш бўйича ҳудудий кенгашлар ташкил этилади. Давлат органлари ва ташкилотларида эса комплаенс ҳамда коррупцияга қарши ички назорат тузилмалари фаолияти йўлга қўйилади.

Мазкур Қонун расмий эълон қилинган кундан яъни кечадан эътиборан кучга кирди.