Чехия президенти Петр Павел НАТО Россиянинг альянс шарқий қанотидаги провокацияларига нисбатан “тишини кўрсатиши” кераклигини айтди.

У The Guardian нашрига берган интервьюсида Москвага қарши “етарлича қатъий, эҳтимол асимметрик” жавоб чораларини кўриб чиқишни таклиф қилди.

Павелнинг сўзларига кўра, бундай чоралар “одамларни ўлдирмайдиган, аммо Россияга бу йўл нотўғри эканини англатадиган даражада сезиларли” бўлиши мумкин.

У мисол сифатида “интернет ёки сунъий йўлдошларни ўчириш”, Россия банкларини молиявий тизимдан узишни келтирган.

Павел, шунингдек, НАТО ҳаво ҳудуди бузилиши давом этса, учувчисиз ёки учувчили самолётларни уриб тушириш масаласи ҳам кун тартибига чиқиши мумкинлигини айтган.

Бу ҳақда The Guardian материалини қайта ёритган “Украинская правда” ҳам ёзди.

Амалда НАТО буни бир тугма билан қила олмайди. Интернет ва сунъий йўлдошлар хусусий компаниялар, миллий ҳукуматлар, ердаги инфратузилма ва халқаро ҳуқуқ билан боғлиқ. НАТО кибер ва космосни ҳарбий домен деб тан олган, аммо бундай ҳужум қарорлари иттифоқчилар консенсуси, ҳуқуқий асос ва эскалация хавфини ҳисобга олади.

Шу маънода, Павелнинг гапи техник жиҳатдан мутлақ имконсиз эмас, лекин ҳозирча кўпроқ сиёсий сигналга ўхшайди: “Россия босим тилини тушунади, НАТО жавоби оғирроқ бўлиши керак”, деган позиция.

The Guardian ҳам буни тайёр режа эмас, Павел таклиф қилган “асимметрик чоралар” сифатида берган.