Бухоро вилояти ҳокимига мурожаат йўллаш учун ташкил этилган Telegram гуруҳининг фаолияти юзасидан Элтузарга танқидий мурожаат келиб тушди. Муаллифнинг даъвосича, фуқароларнинг жиддий муаммолари амалда ечилмасдан, «тушунтириш берилди» деган жавоблар билан ёпилмоқда.

Мурожаатда айтилишича, «ZaripovBotir» гуруҳи 2024 йил июнь ойида иш бошлаган. Унга келиб тушган мурожаатларни саралаш ва тегишли идораларга етказиш учун ҳокимлик ҳамда вилоятдаги ташкилотлар ходимларидан иборат махсус штаб ташкил этилган.

Бироқ муаллиф бу тизимнинг самарадорлигини шубҳа остига олмоқда. Унинг ёзишича, уй-жой сотиб олишда алданган фуқароларнинг шикоятлари, ички ишлар ва йўл ҳаракати хавфсизлиги хизмати фаолиятидан норозилик, кўп қаватли уйларни газга улаш, йўл қуриш, ичимлик суви тармоғини тортиш ва алимент ундириш каби масалалар ечимсиз қолмоқда.

«Гуруҳ ҳақиқатан халқ муаммосини ечиш учун очилган бўлса, шу каби катта муаммоларни биринчи навбатда ечиб бериш керак», – дейди мурожаат муаллифи.

Унинг таъкидлашича, газ ҳисоблагичини блокдан чиқариш, ногиронлиги бўлган шахсларга аравача ёки протез ажратиш, моддий ёрдам бериш каби тегишли идоралар ўз ваколати доирасида бажариши лозим бўлган ишлар ҳоким гуруҳи орқали ҳал этилган натижа сифатида кўрсатилмоқда.

Мурожаатда гуруҳ фаолиятидаги танаффус ҳам танқид қилинган. Муаллифнинг билдиришича, 2026 йил 15 июндан гуруҳда ёзишмалар тўхтатилган, 19 октябрда эса қайта тикланган. У танаффус сабаблари ҳақида расмий изоҳ берилмаганини айтмоқда.

Муаллиф халқ қабулхоналари, ишонч телефонлари ва бошқа мурожаат каналлари мавжуд шароитда алоҳида Telegram гуруҳи ҳамда штабнинг заруратини сўроқ остига олиб, натижа бермаётган бўлса, уни ёпишни таклиф қилган.

Таҳририят мурожаатдаги даъволарни ва гуруҳ фаолиятига оид саналарни мустақил тасдиқлай олмади. Келтирилган Telegram ҳаволалари орқали ёзишмаларни текшириш имкони бўлмади. Элтузар Бухоро вилояти ҳокимлигининг мурожаатлар қандай ҳал этилаётгани ва гуруҳ фаолиятидаги танаффус сабаблари ҳақидаги изоҳини ёритишга тайёр.