Элтузарга йўлланган мурожаатда «Ўзбекфильм» миллий киноконцернидаги текширув натижалари, давлат маблағларининг сарфланиши ва ходимлар маошининг кечиктирилиши юзасидан саволлар кўтарилган. Мурожаат муаллифи Жаҳонгир Аҳмедов ва соҳадаги бошқа масъуллардан очиқ изоҳ кутмоқда.

Мурожаатда текширув давомида қарийб 200 миллион сўм маблағ билан боғлиқ камчиликлар аниқлангани ҳақида маълумотлар тарқалгани айтилган. Мазкур сумма айнан қандай камчиликларга тааллуқли экани очиқланмаган.

Муаллиф текширув натижасида қандай чоралар кўрилгани, аниқланган муаммолар бартараф этилгани ва масъулларнинг жавобгарлиги масаласи кўриб чиқилган-қилинмаганини сўрамоқда.

Мурожаатдаги яна бир масала – тизим ташкилотларида иш ҳақи кечиктирилгани ҳақидаги даъво. Унда маошлар кейинчалик тўлангани айтилса-да, кечикиш учун компенсация ҳисоблангани ва тўлангани юзасидан изоҳ сўралган. Қайси ташкилотларда, қанча ходимнинг маоши ва неча кунга кечиктирилгани кўрсатилмаган.

Шунингдек, «Ўзбекфильм»даги шартномалар, лойиҳаларга ажратилган маблағларнинг мақсадли сарфланиши, грим учун вагон хариди ҳамда биноларни иситиш харажатлари бўйича маълумотларни очиқлаш талаб қилинган.

Мурожаатда келтирилган даъволар мустақил равишда тасдиқланган эмас. Жаҳонгир Аҳмедов ва тегишли ташкилотларнинг ушбу масалалар бўйича муносабати тақдим этилмаган. Элтузар уларнинг изоҳини эълон қилишга тайёр.