Муборак туманида яшовчи собиқ ҳарбий ҳамёнидаги 400 минг сўм пули йўқолганини сезиб, 15 ёшли қизини чақирган.

Суд ҳужжатларидаги маълумотларга кўра, қиз пулни рухсатсиз олганини тан олиб, кечирим сўраган. Аммо ота қизини жазолаш учун уйдан чиқариб юборган ва ўғлидан ошхонадаги ўқловни олиб келишни сўраган. Шундан кейин эркак ўсмир қизини ўқлов билан калтаклай бошлаган. Қизнинг бақириғини эшитган онаси ва аммаси уни тўхтатишга ҳаракат қилган, аммо ота уларни ҳам хонадан чиқариб юборган.

Калтакланганидан кейин қиз ювинтирилиб, бошқа хонага олиб ўтилган. Орадан тахминан 10 дақиқа ўтиб, у ҳушидан кетди. Тез ёрдам етиб келганда қизнинг жони узилган.

Экспертиза унинг оғир тан жароҳатлари ва ички қон кетиши оқибатида ўлганини тасдиқлади. Судда ота қизини ўлдириш нияти бўлмаганини, уни фақат «тарбияламоқчи» бўлганини айтган. Косон туман суди уни айбдор деб топиб, 5 йилга озодликдан маҳрум қилди.