Америкалик неоконсерватив таҳлилчи Роберт Каган The Atlantic журналида чоп этилган “Checkmate in Iran” номли мақоласида АҚШ Эрон билан қарама-қаршиликда жиддий стратегик мағлубият сари бораётганини таъкидлади. Унинг фикрича, бу мағлубият оқибатларини “тузатиб ҳам, эътиборсиз қолдириб ҳам бўлмайди”.

Каганга кўра, АҚШ ва Исроил 37 кун давомида Эронга кучли зарбалар берган, мамлакат раҳбариятининг катта қисми йўқ қилинган ва ҳарбий салоҳияти жиддий заифлаштирилган. Аммо Теҳрон ҳеч қандай ён беришга бормаган. Унинг ёзишича, бурилиш нуқтаси 18 март куни Исроил Эроннинг South Pars газ конига зарба берганидан кейин юз берган. Эрон бунга жавобан Қатардаги Ras Laffan саноат ҳудудига ҳужум қилган ва бу объектга етказилган зарарни тиклаш йиллар талаб қилиши мумкин.

Муаллифнинг фикрича, Дональд Трамп маъмурияти шундан сўнг Эрон энергетика объектларига зарбаларни тўхтатган ва Теҳрон ҳеч қандай имтиёз бермаган бўлса-да, ўт очишни тўхтатишга рози бўлган. Каган бу ҳолатни Вашингтоннинг минтақадаги таъсири жиддий сусайганининг белгиси сифатида баҳолайди.

Каган Эрон Ҳурмуз бўғози устидан назоратни сақлаб қолиши мумкинлигини ёзади. Бу эса, унингча, Теҳронга глобал энергия таъминотига таъсир ўтказиш, Форс кўрфази давлатларига шарт қўйиш ва санкцияларни юмшатиш бўйича босим қилиш имконини беради. У Хитой ва Россиянинг Эрон иттифоқчилари сифатидаги мавқеи мустаҳкамланиши, АҚШнинг эса минтақадаги роли кескин пасайишини башорат қилмоқда.

Таҳлилчи уруш АҚШни ишончсиз ва бошлаган ишини якунлай олмайдиган давлат сифатида кўрсатганини таъкидлайди. Унинг фикрича, бу ҳолат “постамерика дунёси” шаклланишини тезлаштириши, шунингдек, Тайван масаласида Си Цзиньпинни, Европада эса Владимир Путинни янада фаолроқ ҳаракатларга ундаши мумкин.