Москвадаги парад 45 дақиқада тугади. Мушаклар отилмади, меҳмонлар ҳам совиб қолган ошга келгандек “илимилиқ” ўтиришди.

Параддан бир кун аввал Украина президенти Володимир Зеленский Москвада тантанани ўтказишга рухсат бериб, шу мазмундаги қарорни имзолади.

Зотан Путин ҳукумати душман томондан 2 кунлик ярашув сўраб илтижо қилган эди. Келишувга қарамай, икки томонлама ҳужумлар давом этди.

Ҳавотир ва ҳадик соясини Қизил майдонда ўтирган меҳмонлар юзидан яққол сезиш мумкин.

80 ёшга яқинлашиб, ёшини яшаб, ошини ошаб қўйган собиқ КГБ агенти, президент ва саркарда ҳам ўлимдан қўрқиши мумкинми? Мумкин, албатта.

Ҳа, Путин ўлимдан қўрқади. Путин Яратганнинг юксак инояти билан жаннатга ноил бўлиши ҳақида ваҳий келса ҳам, барибир ўлимдан қўрқади.

Чунки Путин кўниккан мутлақ ҳукмронлик ҳисси ва ҳашамат катта эҳтимол билан ҳатто жаннатда ҳам йўқ.

Унинг ўлими – бу яқинларининг қиёмати дегани.