Ўзбекистонда давлат бошқаруви яна бир “тарихий” ғалабани нишонлади: Қишлоқ хўжалиги вазирлиги ҳузурида Чорвачилик ва яйлов хўжалигини ривожлантириш агентлиги ташкил этилди.

Расмий маълумотга кўра, янги тузилма Ветеринария ва чорвачиликни ривожлантириш қўмитаси негизида қайта ташкил этилган. Яъни аввал қўмита бор эди, энди агентлик бор. Номи ўзгарди, лавозимлар ўзгарди, муҳр ўзгарди. Энди сигирлар кўпроқ сут берадими, яйловлар ўз-ўзидан яшнаб кетадими, буни вақт кўрсатади.

Расмийларга кўра, агентлик чорва моллари сонини ошириш, яйловлардан самарали фойдаланиш, озуқа базасини кенгайтириш ва гўшт-сут маҳсулотлари ишлаб чиқаришни кўпайтириш билан шуғулланади. Қисқаси, бу вазифалар аввал ҳеч кимнинг хаёлига келмагандай, яна бир идорага топширилди.

Энг қизиғи, Ўзбекистонда вазирлик, қўмита ва агентликлар сони аллақачон 60 тадан ошди. Расмий рўйхатларда 60 дан ҳам юқори кўриняпти. Камбағаллик, ишсизлик, нарх-наво, коррупция, қишлоқларда сув ва ем-хашак муаммоси эса ҳали ҳам ўз жойида.

Бироқ хавотирга ўрин йўқ: яна бир агентлик тузилди. Демак, энди яйловлар ҳам назоратда, чорва ҳам назоратда, фақат натижа қачон назоратга олиниши номаълум.

Ҳукуматга яна битта таклиф: Энди агентлик тузиш бўйича битта агентлик тузайлик. Унга урилган, сурилган, қамалиб чиққан вазиру ҳокимларни жойлайлик. Нима дейсиз?