Туркиянинг Мўғла вилояти Миляс туманида ўзбекистонлик келин иштирокидаги дабдабали тўй мамлакат матбуотининг асосий мавзуларидан бирига айланди. Турк нашрларининг ёзишича, уч куну уч кеча давом этган тўйдан сўнг 28 ёшли Ўзбекистон фуқароси Маъмура Бурхонова (айрим нашрларда фамилияси Жулпонова деб берилган) тўйда тақилган миллионлаб лиралик олтин ва қимматбаҳо буюмларни олиб кетганликда гумон қилинмоқда. Аёл эса айбловларни рад этяпти.

Воқеа Мўғланинг Миляс туманига қарашли Чомакдағ Қизилағач қишлоғида содир бўлган. Бу ҳудуд Туркияда анъанавий йўрук маданияти ва урф-одатлари сақланиб қолган жойлардан бири сифатида танилган.

Турк матбуотига кўра, маҳаллий фуқаро Мустафо Атешўғлу ва ўзбекистонлик Маъмура учун катта тантана ташкил этилган. Тўй уч куну уч кеча давом этган. Айрим нашрлар бутун маросимга 10 миллион лира атрофида маблағ сарфланганини ёзмоқда.

Тўйнинг кўлами ҳам одатий бўлмаган. Меҳмонлар учун анъанавий тунги ёғли кураш – “yağlı güreş” мусобақалари ўтказилган. Habertürk хабарига кўра, Ялчин Унжул, Абдуллоҳ Гўнгёр, Серҳат Балжи, Режеп Кара ва Файзуллоҳ Актурк каби Туркияда танилган паҳлавонлар курашган, бош паҳлавонликни Файзуллоҳ Актурк қўлга киритган.

Қизиғи, тўй арафасида оила маҳаллий матбуот орқали одамларни тантанага таклиф ҳам қилган. 6 сентябрда турк нашрлари ўша видеоларни қайта тарқатди. Кадрларда Маъмура бўлажак эри Мустафо Атешўғлу ва унинг отаси Меҳмет Атешўғлу билан бирга тўйга тайёргарлик кўраётгани ва меҳмонларни маросимга чорлаётгани кўринади. Habertürk маълумотига кўра, бу учрашув тўйдан икки кун олдин ўтказилган.

Тўйдан кейин келин йўқолган

Куёв томонининг даъвосига кўра, тўйдан кейин эрталаб келин уйда йўқлиги аниқланган. Шунингдек, тўйда тақилган олтин ва бошқа қимматбаҳо буюмлар ҳам топилмаган.

Атешўғлу оиласи йўқолган тақинчоқлар қийматини тахминан 5 миллион турк лираси деб баҳоламоқда. Айрим турк нашрларида эса 3 миллион лиралик тақинчоқ ва 300 минг лира нақд пул ҳақида сўз боради. Демак, ҳозирча йўқолган бойликнинг аниқ миқдори борасида турк матбуотининг ўзида ҳам турлича рақамлар келтирилмоқда.

Оила прокуратурага мурожаат қилганидан кейин полиция суриштирув бошлаган. Миляс полицияси ўзбекистонлик аёлнинг қаердалигини аниқлаб, уни ушлаган.

Бироқ воқеанинг иккинчи томони ҳам бор.

Маъмура полицияда ўзига қўйилган асосий айбловни рад этган. Sözcü нашрининг ёзишича, у ўзи билан фақат 20 та “чейрек олтин” – Туркияда тўйларда анъанавий равишда тақиладиган олтин танга – ва 226 минг лира олганини айтган. Қолган олтинлар қайнотаси Меҳмет Атешўғлуда қолганини даъво қилган.

Полиция аёл ушланган уйда тинтув ўтказган, аммо оила йўқолган деб кўрсатаётган тақинчоқлар у ердан топилмаган.

Ўзбекистонлик келин ҳам эри ва қайнотаси устидан шикоят қилган

Можаро шу билан тугамаган. Турк матбуотининг хабар беришича, Маъмура Бурхонова ҳам куёв томонига қарши ариза берган.

У эри ва унинг оила аъзолари ўзи ҳамда онасини ҳақорат қилгани ва таҳдид қилганини даъво қилган. Аёлнинг версиясига кўра, унинг уйдан кетишига айнан шу таҳдидлар сабаб бўлган. У эри Мустафо ва қайнотаси Меҳмет Атешўғлу устидан шикоят қилган.

Қайнота Меҳмет Атешўғлу эса турк матбуотига пулдан кўра оила шаъни масаласи муҳимлигини айтган.

Шу тариқа, ижтимоий тармоқлар ва айрим турк нашрларида воқеа “ўзбек келин 5 миллионлик олтинни олиб қочди” деган кескин сарлавҳалар билан тарқалаётган бўлса-да, ҳозирча бу – куёв оиласининг даъвоси. Келин айбловни тан олмаган, унинг турган жойидан асосий йўқолган тақинчоқлар топилмаган ва у ҳам қарши томон устидан шикоят қилган.

6 сентябрь ҳолатига кўра, Туркия ҳуқуқ-тартибот идоралари тақинчоқлар қаерда экани, уларни ким олгани ва воқеага бошқа шахслар алоқадор ёки алоқадор эмаслигини аниқлаш бўйича терговни давом эттирмоқда. Шу боис турк матбуотидаги “олтинларни олиб қочган ўзбек келин” деган таърифни ҳозирча исботланган факт эмас, балки тергов қилинаётган даъво сифатида қабул қилиш тўғрироқ бўлади.