АҚШ президенти Дональд Трамп Украинага бошқа президент кераклиги ҳақида яна баёнот берди. Бу Владимир Зеленскийнинг сиёсий келажаги ва мамлакатда президентлик сайловларини ўтказиш масаласини яна кун тартибига олиб чиқди.

Зеленскийнинг эҳтимолий рақиблари қаторида Украинанинг Буюк Британиядаги элчиси, собиқ бош қўмондон Валерий Залужний, Михаил Фёдоров, Кирилл Буданов, собиқ президент Пётр Порошенко ва собиқ бош вазир Юлия Тимошенко тилга олинмоқда.

Бироқ Зеленский фаолиятидан норозилик мавжудлиги украиналиклар ҳозирнинг ўзида сайлов ўтказилишини хоҳлаётганини англатмайди. Уруш давом этаётган бир пайтда сайловларни ташкил этиш жиддий муаммоларга дуч келиши мумкин. Ҳарбий хизматчиларнинг катта қисми фронтда, миллионлаб украиналиклар эса мамлакат ташқарисида яшамоқда.

Айни пайтда Киевнинг Америка разведка маълумотлари, қурол-яроғлари ва Starlink сунъий йўлдош алоқа тизимига боғлиқлиги Вашингтон учун муҳим сиёсий таъсир воситаси бўлиши мумкинлиги муҳокама қилинмоқда.

Трамп Украина раҳбариятига қандай босим ўтказиши мумкин? Зеленскийга кимлар рақобат қила олади? Уруш шароитида президентлик сайловларини ўтказиш қанчалик тўғри бўлади?