АҚШ президенти Дональд Трамп Newsmax телеканалига берган интервьюсида Украина президенти Владимир Зеленскийни танқид қилиб, у билан келишувга эришиш Россия президенти Владимир Путинга нисбатан қийинроқ эканини билдирди.

Трампнинг таъкидлашича, Зеленский Украинадаги урушни тинч йўл билан ҳал қилишга етарлича интилаётгани йўқ.

«Зеленский биз билан ҳамкорлик қилиш учун энг мақбул инсон эмас. Менимча, агар қандайдир келишувга эришилса, бу у билан бўлмайди. У келишувни хоҳламаяпти», — деди Трамп.

АҚШ президенти Зеленскийга нисбатан муносабатини ҳам очиқ баён қилди.

«Мен Зеленскийнинг катта мухлиси эмасман. Назаримда, у билан ишлаш Путинга қараганда қийинроқ», — деди у.

Трамп Украина томонидан Россиянинг нефтьни қайта ишлаш заводларига уюштирилаётган зарбаларни ҳам танқид қилди. Унинг фикрича, бундай ҳужумлар жаҳон бозорида нефть нархининг ошишига таъсир кўрсатмоқда.

«Зеленский нефтьни қайта ишлаш заводларига зарбалар бериш билан жаҳонда нефть нархини оширмоқда. Мен буни шармандалик деб ҳисоблайман», — деди АҚШ раҳбари.

Шунингдек, Трамп Украинада президентлик сайловларини ўтказиш зарурлигини таъкидлади. У мамлакат аҳолисининг амалдаги раҳбариятга муносабатини сайловлар воситасида аниқлаш кераклигига ишора қилди.

«Украинада президентлик сайловлари бўлиши керак. Чунки ҳеч ким менга Украина халқи ўз уйларига ракеталар тушаётганидан мамнун эканини айтмаяпти», — деди Трамп.

Унинг ушбу баёнотлари Украинадаги урушни дипломатик йўл билан тугатиш, Киев ва Вашингтон муносабатлари ҳамда Украинада президентлик сайловларини ўтказиш масалалари муҳокама қилинаётган бир пайтда янгради.