АҚШ президенти Дональд Трамп журналистлар саволларига жавоб берар экан, Россия қўшинлари қўмондонларидан бири йўл қўйган хато туфайли Украинадаги уруш биринчи кундаёқ якунланмаганини таъкидлади.

Трампнинг сўзларига кўра, Россиянинг мингга яқин танки бетон қопламали автомобиль йўлидан ҳаракатланган ва улар Киевга 3,5–4 соат ичида етиб бориши мумкин эди.

«Уларни ҳеч нарса тўхтата олмасди. Уруш бир кунда тугаган бўларди. Аммо бир жуда аҳмоқ генерал қўшинларни асосий йўлдан буриб, дала томон бошлаган. Натижада танклар лойга ботиб қолган», — деди Трамп.

АҚШ президенти ўша генералнинг кимлигини билмаслигини, унинг ҳозиргача тирик эканига ҳам шубҳа қилишини айтди.

Трампнинг фикрича, агар Россия қўшинлари асосий йўлдан ҳаракатланишда давом этганида, урушнинг дастлабки кунидаёқ вазият бутунлай бошқача тус олиши мумкин эди.

Албатта бу Трампнинг шахсий талқини бўлиб, урушнинг бир кунда тугаши мумкинлиги ҳақидаги даъво мустақил равишда тасдиқланмаган.