Тошкент вилоятида жамоат транспорти учун янги тарифлар тасдиқланди. Янги тартибга кўра, электрон тўлов орқали бир марталик йўл ҳақи 2 000 сўм, нақд пулда тўлов эса ундан 30 фоиз юқори — 2 600 сўм этиб белгиланди.

Ушбу ўзгаришлар, аввало, аҳолини транспорт ва банк карталари орқали электрон тўловдан фойдаланишга рағбатлантиришга қаратилган. Шу билан бирга, нақд пулда тўлов қилиш харажатининг оширилиши электрон тўловлар улушини янада кўпайтириши кутилмоқда.

Қарорнинг Тошкент шаҳрига (пойтахтга) таъсири ҳам сезилиши мумкин. Чунки ҳар куни Тошкент вилоятидан пойтахтга иш, ўқиш ва бошқа мақсадларда минглаб фуқаролар қатнайди. Вилоятда электрон тўлов тизимининг оммалашиши Тошкент шаҳрида ҳам ягона ва замонавий тўлов маданиятини шакллантиришга, транспорт тизимлари ўртасидаги уйғунликни кучайтиришга хизмат қилиши мумкин.

Шунингдек, электрон тўловлар кўпайиши йўловчилар оқимини аниқ ҳисоблаш, жамоат транспортини самарали бошқариш ва хизмат сифатини ошириш имконини беради. Нақд пул билан ҳисоб-китоблар камайиши эса автобусларнинг бекатларда ортиқча тўхтаб туриш вақтини қисқартириши мумкин.

Қарорда соатлик, кунлик, уч ойлик, олти ойлик ва йиллик лимитсиз тариф режаларини ишлаб чиқиш ҳам белгиланган бўлиб, бу келгусида мунтазам йўловчилар учун янада қулай ва иқтисодий имкониятлар яратиши кутилмоқда.