Дональд Трамп маъмуриятида ички интизом издан чиқмоқда. Президентнинг олдиндан айтиб бўлмайдиган қарорлари илгари сиёсий қудрат белгиси сифатида қабул қилинган бўлса, энди улар бошқарувдаги тартибсизлик ва заифлик аломатига айланмоқда, деб ёзади Британиянинг The Independent нашри.

Оқ уй матбуот котиби Кэти Закариянинг лавозимга тайинланганидан атиги беш кун ўтиб ишдан бўшатилиши маъмуриятдаги инқирозни яққол кўрсатди. Энг муҳими, Трамп бу тайинловни ўз аппарати раҳбари Сьюзи Уайлс билан маслаҳатлашмасдан амалга оширган. Ҳолбуки, айнан Уайлс сўнгги икки йил давомида Оқ уйда нисбий тартибни сақлаб келаётган эди.

Нашрга кўра, Трампнинг сиёсий мавқеи ҳам заифлашмоқда. Ноябрдаги Конгресс сайловларида республикачилар ҳар икки палатани бой бериши мумкин. Трампнинг ўзи эса Конституцияга кўра, 2028 йилда қайта президентликка сайлана олмайди. Шу боис республикачилар орасида вице-президент Жей Ди Вэнсга эҳтимолий ворис сифатида қараш кучаймоқда.

Ташқи сиёсатдаги қарорлар ҳам президентга қарши ишламоқда. The Independent Эрон билан урушни Трампнинг ҳалокатли хатоси деб баҳолайди. Россия дизелини сотиб олиш бўйича келишув ва Кремлга қарши санкцияларни чеклаш эса Украина тарафдори бўлган америкалик сайловчиларнинг норозилигини кучайтириши мумкин.

Нашрнинг таъкидлашича, Трамп илгари сиёсий қоидаларни бузиш орқали ўз тарафдорларини бирлаштира оларди. Энди эса унинг ҳаракатларида стратегик ҳисоб-китобдан кўра саросима кўпроқ сезилмоқда.

The Independent хулосасига кўра, Трамп даврининг якуни бошланаётган бўлиши мумкин. Бунинг асосий белгиси мухолифат танқиди эмас, балки Оқ уйнинг ўз ичида пайдо бўлаётган дарзлардир.