Солиқ қўмитаси раисининг собиқ биринчи ўринбосари Мубин Мирзаев фирибгарлик, мансаб ваколатини суиистеъмол қилиш ва ҳокимият ҳаракатсизлигида айбдор деб топилди. У билан бир иш доирасида судланган яна саккиз кишига ҳам узоқ муддатли қамоқ жазолари тайинланган. Бироқ суд тарқатган қисқа маълумотда жиноятнинг аниқ механизми, етказилган зарар миқдори ва Мирзаевнинг ҳар бир эпизоддаги роли очиқланмаган.

27 июль куни жиноят ишлари бўйича Шайхонтоҳур туман судида Солиқ қўмитаси раисининг собиқ биринчи ўринбосари Мубин Мирзаев ва яна саккиз нафар шахсга оид жиноят иши бўйича ҳукм ўқилди.

Суд Мубин Мирзаевни Жиноят кодексининг 168-моддаси 4-қисми «а» банди – жуда кўп миқдорда фирибгарлик, 205-моддаси 2-қисми «а» банди – жуда кўп миқдорда зарар етказган ҳолда мансаб ваколатини суиистеъмол қилиш ҳамда 208-моддаси – ҳокимият ҳаракатсизлигида айбдор деб топган.

Унга уч йил муайян ҳуқуқдан маҳрум қилиш билан бирга, 8 йил 2 ой муддатга озодликдан маҳрум қилиш жазоси тайинланди. Жазо Мирзаевга нисбатан қамоққа олиш эҳтиёт чораси қўлланган кундан бошлаб ҳисобланади.

Видео

Мубин Мирзаев 8 йил 2 ойга озодликдан маҳрум қилинди. Суд унга яна уч йил муайян ҳуқуқдан маҳрум қилиш жазосини ҳам тайинлади.

БИР ИШДА ТЎҚҚИЗ НАФАР СУДЛАНУВЧИ

Мубин Мирзаев билан бирга жами тўққиз нафар шахс судланган. Бошқа судланувчилар шахсга доир маълумотлар ҳақидаги қонунчиликни бузиш, солиқ ва йиғимларни тўлашдан бўйин товлаш, савдо ёки хизмат кўрсатиш қоидаларини бузиш, ҳужжат, муҳр, штамп ва бланкаларни қалбакилаштириш ҳамда бошқа жиноятларда айбдор деб топилган.

Уларга 4 йилдан 9 йилгача муддатларга озодликдан маҳрум қилиш жазолари берилган. Суд жиноят оқибатида етказилган зарарларни айбдорлардан ундиришни ҳам белгилаган.

Бироқ эълон қилинган маълумотда зарарнинг умумий миқдори, пул ёки мол-мулк кимга тегишли бўлгани, жиноий схема қандай ишлагани ва судланувчилар ўртасида вазифалар қандай тақсимлангани кўрсатилмаган.

Шунингдек, Мубин Мирзаевнинг айнан қайси ҳаракатлари фирибгарлик, қайси қарорлари мансаб ваколатини суиистеъмол қилиш, қайси ҳолатлардаги ҳаракатсизлиги эса жиноий жавобгарликка сабаб бўлгани очиқланмади.

ОЛТИ ОЙ АВВАЛ ПРЕЗИДЕНТ ТАНҚИДИДАН СЎНГ ИШДАН ОЛИНГАНДИ

Мубин Мирзаев 2026 йил 27 январда президент Шавкат Мирзиёев раислигида ўтказилган видеоселектор йиғилишида лавозимидан озод этилган эди.

Йиғилишда Тошкент шаҳридаги бозор ва савдо комплексларида тўлов интизоми таъминланмагани, яширин савдо айланмаси ва солиқдан қочиш ҳолатлари кенг тарқалгани кескин танқид қилинган.

Расмий маълумотларга кўра, «Малика» савдо мажмуасида фаолият юритган қарийб 1,5 минг тадбиркорнинг фақат тўртдан бири белгиланган тартибда рўйхатдан ўтган. Тадбиркорларнинг 25 фоизи ойига бир миллион сўм ҳам солиқ тўламаган. 2025 йил декабрь ойида пластик карталар орқали амалга оширилган 600 миллиард сўмлик савдо тушуми яширилгани айтилган.

Тошкент шаҳар солиқ бошқармаси бюджет режасини бажариш учун яхши ишлаётган 46,4 мингта корхонадан жами 876 миллиард сўм ортиқча солиқ тўлови ундиргани ҳам маълум қилинган.

Қўшилган қиймат солиғидан сунъий ортиқча тўлов ҳосил қилиб, уни бюджетдан ноқонуний равишда қайтариб олиш ҳолатлари кўпайган. 2025 йилда ҚҚСни ноқонуний қайтариш билан боғлиқ ишлар бўйича 20 нафар солиқ ходимига нисбатан жиноят иши қўзғатилган.

Президент ушбу йўналишга масъул бўлган Мубин Мирзаевни «лоқайдлик ва масъулиятсизлик»да танқид қилган ва уни лавозимидан озод этган.

МУБИН МИРЗАЕВ КИМ?

Мубин Мирзаев 1969 йилда Бухоро вилоятида туғилган. У Тошкент давлат университетида математика, Тошкент молия институтида молия йўналишида таҳсил олган. Шунингдек, Япониядаги Сиёсий тадқиқотлар миллий институтида иқтисодиёт бўйича магистр даражасини олган.

Мирзаев меҳнат фаолиятини 1993 йилда Тошкент давлат университетида бошлаган. Кейинчалик Фанлар академиясининг Математика институтида тадқиқотчи ва аспирант бўлиб ишлаган.

1996–2008 йилларда Марказий банк тизимида турли лавозимларда фаолият юритиб, монетар сиёсат ва иқтисодий таҳлил департаменти директори даражасигача кўтарилган.

2008–2017 йилларда молия вазири ўринбосари, 2017–2018 йилларда иқтисодиёт вазирининг макроиқтисодий сиёсат, базавий тармоқларни ривожлантириш ва халқаро молия институтлари билан ишлаш масалалари бўйича биринчи ўринбосари бўлган.

2018 йил декабрида Давлат солиқ қўмитаси раисига биринчи ўринбосар этиб тайинланган ва бу лавозимда етти йилдан ортиқ ишлаган.

МАТБУОТДА СОЛИҚ ИСЛОҲОТЛАРИНИНГ АСОСИЙ СПИКЕРИ ЭДИ

Мубин Мирзаев лавозимда ишлаган йилларида солиқ сиёсати ва солиқ маъмурчилигига оид ислоҳотларни жамоатчиликка тушунтириб келган асосий амалдорлардан бири эди.

У матбуотга берган интервьюларида Ўзбекистоннинг Жаҳон савдо ташкилоти ёки Евроосиё иқтисодий иттифоқи каби халқаро тузилмалар билан интеграциялашуви учун ички ва импорт товарларига қўлланадиган солиқ ставкаларини бирхиллаштириш зарурлигини айтган.

Шунингдек, қуйи солиқ органлари тадбиркорларга сунъий тўсиқ яратаётганини танқид қилган ва солиқ тизими назорат органидан хизмат кўрсатувчи тизимга айланиши кераклигини таъкидлаган.

2025 йилдаги матбуот анжуманларидан бирида у ўзини ўзи банд қилган фуқароларга оид тартибларни қайта кўриб чиқишдан асосий мақсад кўпроқ солиқ ундириш эмас, балки бир хил фаолият билан шуғулланувчи тадбиркорлар учун тенг шароит яратиш эканини айтган эди.

Шу маънода, Мирзаевнинг жиноий жавобгарликка тортилиши солиқ тизимидаги оддий кадрлар алмашинуви эмас. Гап узоқ йиллар давомида солиқ сиёсати, бюджет тушумлари, яширин иқтисодиётга қарши кураш ва йирик солиқ тўловчилар билан ишлаш каби муҳим йўналишларни мувофиқлаштирган юқори лавозимли амалдор ҳақида кетмоқда.