Сурхондарё вилоятининг Шўрчи туманида Россия Қуролли кучлари сафига ёлланиб, Украинадаги ҳарбий ҳаракатларда қатнашиш учун тайёргарлик кўрган фуқарога ҳукм ўқилди. Суд Зокиржон Алимовни ёлланма аскарликда айбли деб топиб, унга 3 йилу 6 ой муддатга озодликни чеклаш жазосини тайинлади.

Жиноят ишлари бўйича Шўрчи туман судининг 2026 йил 23 июндаги ҳукмига кўра, Алимов 2025 йил март ойида ишлаш ва даромад топиш мақсадида Россиянинг Пенза вилоятига борган.

Орадан уч ой ўтиб, 2025 йил 12 июнь куни у Россия Қуролли кучларига қарашли Владивостокдаги 30926-сонли ҳарбий қисм билан шартнома имзолаган. Унга ҳарбий жетон берилган ва Россия-Украина урушида Россия томонидан иштирок этиш учун ҳарбий хизматга қабул қилинган.

Суд ҳужжатида қайд этилишича, Алимов дастлаб Севастополдаги ҳарбий қисмга олиб борилган. У ерда унга ҳарбий кийим, бронежилет, каска, Калашников автомати, ўқ-дори ва бошқа жиҳозлар берилган.

У 15 кун давомида автоматдан ўқ отиш, дронлардан ҳимояланиш, жароҳатланганларга биринчи ёрдам кўрсатиш ва жанг майдонида ҳаракатланиш бўйича тайёргарликдан ўтган. Кейинчалик у бошқа ҳарбий хизматчилар билан бирга Курск вилоятидаги полигонга юборилган.

2025 йил 19 июль куни ҳарбий машғулотлар вақтида Алимов чап оёғини синдириб олган. У Курскдаги госпиталга, кейин эса Москвадаги Вишневский ҳарбий госпиталига ўтказилиб, жарроҳлик амалиётидан сўнг бир неча ой даволанган.

Судланувчининг кўрсатувига кўра, у ҳарбий ҳаракатларга боришни истамаган. У Пензада миграция ҳужжатларини узайтириш учун марказга маст ҳолда борганида, ходимлар уни ҳарбийларга топшириб юборганини ва мастлигидан фойдаланиб шартнома имзолатилганини айтган.

Алимовнинг билдиришича, унга Россия Қуролли кучлари сафига киргани учун 400 минг рубль берилган. Пул Ўзбекистондаги банк картасига ўтказилган ва кейинчалик оиласи томонидан уйни таъмирлашга сарфланган.

У ҳарбий полигонда атайлаб хандаққа сакраб, оёғини синдирганини ҳам тан олган. Судланувчи бу йўл билан ҳарбий ҳаракатларга юборилишдан қутулишга уринганини билдирган.

2025 йил декабрь ойида госпиталдан чиққан Алимов Владивостокка борган ва Ўзбекистон консуллиги орқали Ватанга қайтиш гувоҳномасини олган. Унга ҳарбий қисм томонидан таътил чиптаси ҳам расмийлаштирилган.

2026 йил 11 январь куни у Владивосток-Тошкент авиарейси билан Ўзбекистонга қайтган.

Орадан бир неча кун ўтиб, ҳуқуқни муҳофаза қилувчи органлар Украина томонининг «Проект хочу жить» Telegram каналида эълон қилинган рўйхатдан унинг маълумотларини аниқлаган. Рўйхатда 2025 йилда Россия Қуролли кучлари билан шартнома имзолаган 902 нафар Ўзбекистон фуқароси ҳақида маълумот келтирилган.

Текширув давомида Алимов ўзининг Россия ҳарбий қисми томонидан берилган таътил чиптасини тақдим қилган. Суд мазкур ҳужжат, Telegram каналидаги рўйхат, кўздан кечириш баённомалари ва гувоҳларнинг кўрсатувларини айбни тасдиқловчи далиллар сифатида баҳолаган.

Дастлабки терговда Алимовга Жиноят кодексининг икки моддаси – ёлланма аскарлик ҳамда Ўзбекистон фуқаросининг чет давлат ҳарбий хизматига ёлланиши бўйича айблов қўйилган.

Бироқ суд чет давлат ҳарбий хизматига кириш шахснинг ўз хоҳиш-иродаси асосида амалга оширилиши кераклигини қайд этган. Суд Алимовнинг Россия армиясига кириши ихтиёрий бўлмаган, деган хулосага келиб, Жиноят кодексининг 154¹-моддаси 2-қисми бўйича уни оқлаган.

Шу билан бирга, суд 400 минг рубль эвазига ҳарбий ҳаракатларда қатнашиш учун ёллангани, ҳарбий қурол ва жиҳозлар олгани ҳамда жанговар тайёргарликдан ўтганини Жиноят кодексининг 154-моддаси 1-қисмидаги ёлланма аскарлик жинояти деб топган.

Суд Алимовнинг айбига иқрорлиги, пушаймонлиги, муқаддам судланмагани ва соғлиғини енгиллаштирувчи ҳолатлар сифатида ҳисобга олган. Натижада унга модда санкциясида кўрсатилган қамоқ жазоси ўрнига 3 йилу 6 ой озодликни чеклаш жазоси берилган.

Ҳукмга кўра, Алимов ишлаш ва зарур эҳтиёжлардан ташқари вақтда яшаш жойидан чиқиши мумкин эмас. У пробация органининг розилигисиз яшаш манзилини ўзгартириши ва Сурхондарё вилояти ҳудудидан ташқарига чиқиши ҳам тақиқланган.