Элтузарга ЎзДЖТУнинг ўқитувчиларидан сертификат талаби ҳақида шикоятлар келиб тушмоқда. Одатда, Элтузар бу мавзуга тўхталса, доим сертификат заруратини бот-бот уқтиради. Бироқ айни дамда ушбу университетдаги нозик нюансларни ёритишимиз шарт.

Биринчидан, университет маъмурияти ҳеч бир ўқитувчига олдиндан расмий огоҳлантириш, хат-ҳужжат бермади. Университет ректори Адолат партияси пионери эканини инобатга олсак, бу ҳолатни ҳуқуқий саводсизликка йўйиб бўлмайди.

Иккинчидан, бир марта миллий ёки халқаро сертификатни қўлга киритган устозлардан қайта-қайта сертификат талаб қилиш – мантиққа зид. Зотан ўқитувчи университетнинг KPI талабини бажариш ва тадбирбозликдан ортмайди.

Учинчидан, айни шу университетнинг хорижий тилда нутқи узуқ-юлуқ,  талаффузи ҳаминқадар бўлган ўқитувчилари қўша-қўша илмий даражалар ва унвонлар олган. Уларнинг хорижий тил компетенцияси пастлиги ҳақида университет талабалари ҳам шикоятчи.

«Ишда қолиш учун илмий даража ёки сертификат зарур. Илмий иш жараёнлари жуда секин. Лекин бизга шу талабни қўяётган раҳбариятнинг ўзи ҳар томонлама ўрнак бўлмайдими? Қани,  улар ҳам мутахассислик чет тилидан шаффоф тестда кириб С1 олишсин. Юқори лавозимда ўтириб илмий даражали бўлиш фахрий ёрлиқ олишдек гап. Ўқишга кирган талабанинг сертификатдан бошқа ташвиши бўлмаган, ҳам бир марта олди дегани яна икки йилдан кейин натижани такрорлашини англатмайди. Бир марта ўз билимини исботлаб шу сертификатни олиб келган ўқитувчини тинч қўйишсин.»

Дарҳақиқат, ўйинчоқ кенгашдан илмий ишни ўтказиб диплом олиш осон. Айниқса,  талабгор бирор лавозимда ўтирса ёки кенгашда «танкаси» бўлса илмий даража олиш каррасига осонлашади. Шунинг учун, талаб қўйилдими, унга каттаю-кичик бирдек амал қилиши керак. Танланган хосларни четлаб ўтадиган сертификат талаби шунчаки босим ва қувғин усулига айланиб қолмасин.