Бугун катта футболни охирги глобал юлдуз тарк этди. Шу улкан юлдузлар даври шоҳиди бўлгани билан барчани табриклаймиз. 2026-ЖЧ финалида футбол тарихидаги улкан авлодлар алмашинувига гувоҳ бўлдик.

Испания чемпион – ёш авлод мухислари учун биринчи зўр янгилик. Хайрулла Ҳамидов финални шарҳламади – бу ҳаммамиз учун иккинчи зўр янгилик.

Илтимос, рўмонтик адабиёт ихлосмандлари бу таҳлилни шу нуқтада тарк этинг. Шарҳловчиларга қаратилган зарбаларга бардош беролмайсизлар.

Авваламбор, Даврон Файзиевга раҳмат. Афтидан, у танқидларга қулоқ солди ва тўғри хулоса қилди. Чунки шу сафар финал ўйинини кўзимизни юмиб эшитиб ҳам бироз тушунгандек бўлдик. Шарҳ айнан ўйин жараёнини қамради, энциклопедик фактбозлик камроқ бўлди.

Аммо, Испаниянинг прессинги ортгани сайин Файзиевнинг Аргентинага “раҳми” кела бошлади. Шарҳловчи “ана Месси ундоқ, мана Месси бундоқ, аллақандай режа бор, кутайликчи, ютиб кетар” каби фаворитизмга берилди. Ҳар сафар Аргентина ўз дарвозаси олдида бироз тезлашганда Файзиевнинг “Аргентина жонланди” дея энтикиши аянчли эди. Жонланиш фақат рақиб ҳудудида бўлади, укалар. Ўз ҳудудида тезлашган жамоа “ҳимоя талвасасида” дейилади.

Аргентина очиқча даҳанаки жанг, ёлғон шикоятлар, провакация устига ўйин қурди – жамоанинг услуби шу нуқталарга таянади доим. Майли, буларни эфирда очиқ айтиш оғир бўлса-да, ўйин якуни яқинлашгани сайин “кумирнинг” жамоасига ён босавериш – профессионализм эмас.

Энди, сўзимиз адабиёт ихлосманди бўлмиш Хайрулла Ҳамидовга тақалади. Бу шахснинг эътиқодий тушунчаси борлиги, шеърий машқларини инобатга олиб бир ўгитни эслатайлик. Инжилда “ўзинг учун ҳеч кимдан даҳо/илоҳ/мутлақ буюк шахс ясаб олма” дейилади (20:4-6). Бу фалсафа Исломда ҳам бор. Ўгитни футбол тилига ўгирамиз: жамоадаги бир кишига нисбатан фанатик муҳаббат умумий реал фактларни холис баҳолашга тўсиқ бўлади.

Футбол – 11 кишининг ўйини, Аргентина термаси эса асосан даҳанаки жанжалларга таянди. Шу вазиятни бизнинг профессионал мактаб кўрмаган шарҳловчиларимиз ҳам билади. Лекин очиқ эътироф этмайди. Балки THE GOATнинг фанбазаси маломатидан қочишар. Чунки Хайрулла Ҳамидов ҳам, Даврон Файзиев ҳам Аргентинанинг эмас, айнан Мессининг ғалабаси учун ёниб-куйишди. Майли, уйдаги экран қаршисида мухлислик қилиш бошқа масала. Бироқ шахсий позицияни микрофон қаршисига кўтариб келиш – мутлақо делитантлик. Оқибат нима бўлди? Турнир давомидаги оҳ-воҳлар, аванс сифатида янграган мақтовлар иш бермади.

Испания адолатли равишда ғолиб. Техник совуққонлик, жамоа механизми, ёш қон ва ёш куч ўз сўзини айтди. Жамоа ёш, қони қайноқ – улардан нишонлаш пайтида безбет қилиқлар ҳам кутган эдик очиғи. Лекин бундай бўлмади.

Ўйиндан сўнг провакацион жанжални катталар бошлади. Зумерлар бумерларга нисбатан, рақибга нисбатан тўлиқ ҳурмат сақлашга уринди ҳамда уларга ҳикматли ўрнак кўрсатди.

Демак, кубок, дарҳақиқат, муносиб эгаларига топширилди. Характерли спорт ғолиб бўлди. Майдонларда зумерлар даври бошланди.

Алвидо Месси, салом Ямал!