Криштиану Роналду Миллатлар лигаси учрашувлари давом этаётган бир пайтда Португалия терма жамоаси йиғинини тарк этганини маълум қилди.

Футболчи бу қарорни бош мураббийнинг матбуот анжумани ва Португалия футбол федерацияси президенти билан суҳбатдан сўнг қабул қилган.

«Терма жамоа бош мураббийининг матбуот анжумани ва Португалия футбол федерацияси президенти билан суҳбатдан сўнг йиғинни тарк этишга қарор қилдим. Вақти келганда, барча португалияликларга бунинг сабабларини айтиб бераман», деган Роналду.

Ҳужумчи Норвегияга қарши ўйинни тўлиқ захира ўриндиғида ўтказган. Бош мураббий Жорже Жезуш уни учрашув давомида майдонга туширишни режалаштирганини, бироқ ўйиндаги вазиятдан келиб чиқиб қарорини ўзгартирганини айтган.

Шундан сўнг ОАВда Роналду машғулотда қатнашишдан бош тортгани ҳақида хабарлар тарқалди. Жезуш бу маълумотни рад этиб, футболчи алоҳида жисмоний машқлар бажарганини билдирган. Мураббий Данияга қарши навбатдаги баҳсда ҳам Роналду асосий таркибда майдонга тушмаслигини айтган.

A Bola нашри футболчининг Копенгагендаги стадиондан чиқиб кетгани акс этган видеони эълон қилган. Marca маълумотига кўра, у хусусий самолётда Мадридга йўл олишни режалаштирган.

41 ёшли Роналду Португалия терма жамоаси билан 2019 ва 2025 йилларда Миллатлар лигасида ғолиб чиққан. Ҳозирча у терма жамоадаги фаолиятини бутунлай якунлагани ҳақида расман эълон қилмаяпти.