Жанубий Кореяда Сурияда фаолият юритувчи, БМТ террорчилик ташкилоти сифатида рўйхатга киритган «Тавҳид вал-Жиҳод Катибаси» гуруҳини молиявий ва моддий қўллаб-қувватлаш билан боғлиқ ишда Ўзбекистон фуқароси 2 йилга озодликдан маҳрум қилинди.

Кванжу шаҳар суди 3 сентябрь куни терроризмни молиялаштиришга қарши қонунни бузганликда айбланган Ўзбекистон фуқаросига икки йиллик қамоқ жазоси тайинлади. Шунингдек, ундан 60,83 миллион вон миқдорида маблағ ундирилиши белгиланди.

Мазкур иш доирасида Жанубий Корея ҳуқуқни муҳофаза қилувчи органлари жами тўрт нафар Ўзбекистон фуқаросини аниқлаган.

Кванжу полицияси маълумотига кўра, асосий фигурант 2024 йил августидан 2025 йил апрелигача KTJга етти марта криптовалюта ўтказган. Ўтказмаларнинг умумий қиймати тахминан 6,3 миллион вон – 4,6 минг АҚШ долларини ташкил қилган.

Тергов материалларида, шунингдек, у Катибадан криптовалюта кўринишида маблағ қабул қилиб, Жанубий Кореяда транспорт ва махсус техника харид қилишда фойдалангани қайд этилган.

Полиция маълумотига кўра, Сурияга жами 11 та ишлатилган автомобиль ва 2 та экскаватор жўнатилган. Уларнинг умумий қиймати қарийб 170 миллион вон бўлган. Техника оддий экспорт маҳсулоти сифатида расмийлаштирилиб, кейинчалик KTJ фаолият юритадиган Сурия ҳудудига етказилгани айтилмоқда.

Терговчилар асосий айбланувчининг укаси Сурияда KTJ сафида бўлганини ҳам аниқлаган. Полиция версиясига кўра, айнан шу алоқа орқали у террорчи гуруҳ билан муносабат ўрнатган.

Асосий фигурант 2026 йил апрель ойида қўлга олинган. Ундан бир ой аввал Интерпол уни қизил бюллетень асосида халқаро қидирувга берган эди. Кейинчалик у ҳибсда судга топширилган.

Ишга алоқадор яна уч нафар Ўзбекистон фуқароси асосий фигурантга автомобилларни топиш, харид қилиш ва экспорт ишларида ёрдам берганликда гумон қилинмоқда. Улар ҳибсга олинмаган ва уларга нисбатан тергов давом этмоқда.

Жанубий Корея полицияси бу мамлакатда террорчилик ташкилотидан келган маблағ эвазига транспорт ва техника сотиб олиб, уни чет элдаги террорчи гуруҳга етказиб бериш билан боғлиқ илк аниқланган ҳолат эканини билдирган.