Эрон АҚШ мамлакат объектларига яна зарба берса, Форс кўрфазидаги Америка нефть ва газ манфаатлари ҳам нишонга айланиши мумкинлигидан огоҳлантирди. Бу ҳақда Reuters хабар берди.

«Бизнинг объектларимизга зарба берсангиз, ўзингиз ҳам зарба оласиз», – деди Эрон парламенти спикери Муҳаммад Боқир Қолибоф.

Бу баёнот АҚШ ва Эрон кучлари дам олиш кунлари кемаларга ўзаро зарбалар берганидан кейин янгради. Тўқнашувлар ортидан нефть нархи қарийб олти ҳафталик энг юқори даражага кўтарилди.

Қолибоф АҚШ мудофаа вазири Пит Ҳегсетнинг Эрон танкерлари «ҳимоясиз» экани ҳақидаги гапларига жавобан Форс кўрфазидаги Америка нефть-газ компаниялари ва инфратузилмаси ҳам «очиқ ва етиб бориш мумкин бўлган» нишонлар эканини таъкидлади.

Айни пайтда Теҳрон Ҳурмуз бўғозида назоратни янада кучайтирмоқда. Эрон расмийлари яқин кунларда Форс кўрфазида янги чекланган ҳудуд ва кемалар учун янги ҳаракат йўлаги эълон қилинишини билдирган.

«Америкаликлар Эронга қарши ҳужум ва таҳдидларни тўхтатмагунча Ҳурмуз бўғозининг очиқ қолишини кафолатламаймиз», – деди Эроннинг юқори мартабали хавфсизлик амалдори Моҳсен Ризоий.

Reuters маълумотига кўра, сўнгги 10 кунда Ҳурмуз бўғозидан кунига ўртача атиги 10 та юк кемаси ўтган. Бу май ойидан бери энг паст кўрсаткич.

Ҳурмуз бўғози орқали урушга қадар дунё нефть ва суюлтирилган газ ташувларининг қарийб бешдан бир қисми ўтар эди.

АҚШ санкциялари ва нефть экспортига босим кучайиб бораётган бир пайтда Теҳрон Ҳурмуз бўғозини ўзининг асосий босим воситаларидан бири сифатида сақлаб қолмоқда.

Вазият яна кескинлашса, зарба фақат Эрон ёки АҚШга эмас, балки бутун Форс кўрфази энергетика инфратузилмаси ва жаҳон нефть нархларига тегиши мумкин.