АҚШда йилнинг энг шов-шувли суд жараёнларидан бири якуний босқичга кирди. 36 ёшли Линдси Клэнси уч нафар боласини ўлдиришда айбланмоқда.
Клэнсининг ҳимоячилари жиноят содир этилган пайтда аёл туғруқдан кейинги психоз ҳолатида бўлгани ва қилаётган ишини тўлиқ англамаганини таъкидлашяпти.

Ҳимоя томонининг асосий далилларидан бири воқеанинг кутилмаганда содир бўлганида. Фожиа юз берган куни Клэнси фарзандлари билан вақт ўтказиб, улар билан бирга қор одам ясаган. Собиқ эри ҳам унинг руҳий ҳолати яхшиланаётганига ишонган.
Прокуратура эса бутунлай бошқа фикрда. Айблов томонининг таъкидлашича, Клэнси фарзандларини ўлдириш ҳақида совуққон ва пухта ўйланган қарор қабул қилган.

Суд ҳайъати ҳозирча якдил қарорга кела олмади. Массачусетс штати қонунчилигига кўра, агар ҳайъат иккинчи марта ҳам якдил хулосасиз қайтса, судья уларга ягона қарорга келиш зарурлигини яна бир бор уқтиради.

Агар суд ҳайъати учинчи бор ҳам умумий қарорга кела олмаса, судья иш бўйича суд жараёнини тўхтатиши мумкин. Ушбу иш жамоатчилик эътиборини тортиб, айбловнинг оғирлиги ҳамда Клэнсининг руҳий ҳолати унинг ўз ҳаракатларини англаш ва назорат қилиш қобилиятига қай даражада таъсир қилгани ҳақидаги баҳсларга сабаб бўлмоқда.