Ангренда Instagram орқали “муҳаббат” бошлаган йигит муносабатни тўй билан эмас, тилла узук, 500 доллар ва кейинроқ 10 минг долларлик “тариф” билан якунлашга уринган.

Бироқ унинг “романтик бизнес-режаси” Ангрен шаҳар судида муваффақиятсиз стартап деб топилди. Суд йигитни товламачиликда айбли деб топиб, 2 йилу 6 ойга озодликдан маҳрум қилди.

Суд ҳужжатига кўра, 2007 йилда туғилган йигит 2025 йил апрелида Instagram орқали қиз билан танишган. Аввалига илиқ сўзлар, ишқий муносабатлар ва “уйланаман” деган ваъдалар бўлган.

Хуллас, сценарийнинг биринчи қисми одатий сериаллардагидек бошланган.

Кейин эса “Ромео” жанрни кескин ўзгартириб, мелодрамадан криминал триллерга ўтган. У қизга тегишли шахсий фото ва видеоларни қўлга киритиб, муносабатлар узилганидан кейин уларни яқинларига кўрсатиш билан қўрқита бошлаган.

Дастлабки “обуна нархи” – 500 доллар.

Жабрланувчида бундай пул бўлмагани учун, 2026 йил 20 март куни қиймати 2 миллион сўм бўлган тилла узукни беришга мажбур бўлган. Йигит узукни сотиб, пулини шахсий эҳтиёжларига ишлатган. Демак, “соф муҳаббат” бозор нархида нақдлаштирилган.

Аммо ёш “тадбиркор” бир узук билан тўхтаб қолмаган.

Орадан тўрт кун ўтиб, у ўз «хизматлари» нархини бирданига 10 минг долларга кўтарган. Инфляция таъсир қилганми ёки иштаҳаси очилганми – суд ҳукмида бу ҳақда маълумот йўқ.

Жабрланувчи бунча пули йўқлигини айтгач, йигит “чегирма акцияси” эълон қилиб, 300 долларга рози бўлган.

Бу сафар эса қиз воқеани оиласига айтиб, ички ишлар органларига мурожаат қилган.

2026 йил 25 март куни Ангрендаги “Фреш” савдо мажмуаси олдида йигит 300 долларни олаётганида ҳуқуқни муҳофаза қилувчи органлар ходимлари уни кутиб турган. Натижада пулни сарфлашга улгурмаган “Ромео”нинг кейинги учрашув манзили тергов хонаси бўлган.

Суд мажлисида у айбига тўлиқ иқрор бўлиб, чин кўнгилдан пушаймонлигини билдирган. Одатда бундай пушаймонлик ички ишлар ходимлари пул билан бирга пайдо бўлганидан кейин бошланади.

Суд зарар қоплангани, судланувчи муқаддам судланмагани ва қилмишидан пушаймон бўлганини енгиллаштирувчи ҳолат деб баҳолади. Бироқ товламачилик такроран содир этилгани ва жиноятнинг ижтимоий хавфини ҳам эътибордан четда қолдирмади.

Натижада Instagram’да бошланган “севги қиссаси” умумий тартибли колонияда давом этадиган бўлди.

Йигит 2 йилу 6 ойга озодликдан маҳрум қилинди. Жазо муддати 2026 йил 25 мартдан ҳисобланади.

Унинг «иш қуроллари» — iPhone 11 Pro ва iPhone 7 телефонлари, шунингдек Telegram ёзишмалари жиноят иши ҳужжатлари билан бирга сақланади.

Қиссадан ҳисса шуки, Instagram’да “уйланаман” деган ҳар бир одам куёв бўлиб чиқмайди. Айримлари нархнома билан келган товламачи бўлиши ҳам мумкин.