(4-ҚИСМ)

Элтузарга келган олти қисмли мурожаатдаги энг аниқ ва ҳужжат билан текшириш мумкин бўлган ҳолат 2024 йил 6 сентябрдаги 297-сон буйруқда учрайди.

Ушбу буйруқ педагогик маҳорат марказлари ва вазирлик тизимидаги бошқа малака ошириш муассасаларига маъмурий-бошқарув ва педагог ходимларни танлов асосида ишга қабул қилиш тартибини белгилаган. Буйруқ Ҳилола Умарова томонидан имзоланган.

Низомга кўра, номзод суҳбатда бешта саволдан иборат билет танлайди. Ҳар бир саволга берилган жавоб 0 дан 5 баллгача баҳоланади.

Ҳисоб оддий:

5 та савол × 5 балл = 25 балл.

Ҳужжатнинг ўзида ҳам якуний натижа бешта баҳо — b1+b2+b3+b4+b5 йиғиндиси сифатида кўрсатилган.

Бироқ худди шу жадвалнинг пастки қисмида:

“Суҳбатнинг умумий баҳоси — 0–75”

деб ёзилган.

Кейинги иловада номзоднинг синов дарси ўнта мезон бўйича баҳоланади ва унда умумий максимал натижа 25 балл экани аниқ кўрсатилган.

Шундай қилиб, ҳужжатдаги очиқ формула бўйича суҳбат 25 балл, синов дарси яна 25 балл бўлиши керакдек кўринади.

Унда суҳбат учун ёзилган 75 балл қаердан пайдо бўлган?

Эҳтимол, бу оддий техник хато бўлиши мумкин. Эҳтимол, ҳар бир саволни бошқа шкала асосида баҳолаш кўзда тутилган, аммо жадвал тўғри тузилмаган.

Лекин танловда бир балл ҳам инсоннинг ишга кириши ёки ишсиз қолишини ҳал қилар экан, 50 баллик ноаниқликни “оддий хато” деб четга суриб бўлмайди.

Мурожаат муаллифлари бу ноаниқ мезон илмий даражали ва тажрибали номзодларга паст балл, тажрибаси камроқ шахсларга эса юқори балл қўйиш имконини берган бўлиши мумкинлигини даъво қилмоқда.

Ҳозирча бу даъвони тасдиқловчи танлов баённомалари ва номзодлар баллари тақдим этилмаган. Қолган 50 балл коррупция учун ишлатилган, деб хулоса қилишга ҳам асос йўқ.

Аммо вазирлик қуйидаги саволларга очиқ жавоб бериши шарт:

297-сон буйруқдаги 75 балл техник хатоми?

Хато қачон ва қайси ҳужжат билан тузатилган?

2024 йил сентябридан бери ушбу мезон бўйича нечта танлов ўтказилган?

Танлов комиссиялари амалда суҳбатни 25 баллданми ёки 75 баллданми ҳисоблаган?

Нотўғри мезон таъсир қилган бўлса, танлов натижалари қайта кўриб чиқиладими?

Бу саволларга жавоб берилмагунча, 297-сон буйруқ асосида ўтказилган танловларнинг холислиги юзасидан шубҳалар сақланиб қолади.