Кремль Қозоғистон президенти Қосим-Жўмарт Тўқаевнинг Россия ва Украина ўртасидаги урушни музлатиш ҳамда тинчлик музокараларига қайтиш ҳақидаги таклифини рад этди.

Россия президенти матбуот котиби Дмитрий Песковнинг айтишича, Владимир Путин Тўқаевга Украинадаги ҳарбий ҳаракатларнинг бориши ҳақида “батафсил маълумот берган”.

“Киевнинг позициясини ҳисобга олганда, урушни шунчаки музлатишнинг имкони йўқ. Биз учун асосий шарт бор – қўйилган мақсадларимизга эришишимиз керак”, – деди Песков Интерфакс агентлиги саволига жавобан.

Тўқаев 25 июль куни Россиянинг Омск шаҳрида Путин билан учрашуви чоғида Украинадаги урушни тўхтатиш учун можарони музлатиш ва “Стамбул формуласи 2.0” асосида музокараларни қайта бошлашни таклиф қилган эди.

“Балким, бу можарони энди музлатиш ва Стамбул формуласи 2.0 га қайтиш керакдир. Чунки у ерда сезиларли натижаларга эришилган эди. Кейин эса йирик давлатлар, жумладан Россия кафолати остида узоқ кутилган тинчлик сари ҳаракат қилиш мумкин”, – деди Қозоғистон президенти.

Тўқаев Россия ва Украина ўртасидаги урушни давлатлараро можаро деб атаб, унинг сабаблари кўпчилик, жумладан Қозоғистон учун ҳам тўлиқ тушунарли эмаслигини билдирди. Кремль эса Тўқаевнинг Украина масаласидаги позициясини “изчил” деб атади, бироқ бу Москва уни қўллаб-қувватлайди дегани эмаслигини таъкидлади.

Россия ва Украина вакиллари 2022 йилда кенг кўламли босқин бошланганидан кейин ҳамда 2025 йилда Истанбулда музокаралар ўтказган, аммо томонлар урушни тўхтатиш бўйича келишувга эриша олмаган.