Буюк Британияда нейрожарроҳлар миядаги ўсимтани операция жараёнида реал вақтда ишлаган сунъий интеллект ёрдамида олиб ташлашди. University College London Hospitals маълум қилишича, бу технология тирик беморда мия операцияси вақтида қўлланган биринчи ҳолат ҳисобланади.

Операция Лондондаги National Hospital for Neurology and Neurosurgery шифохонасида 48 ёшли Рис Хиббертда ўтказилган. Унинг гипофиз безида диаметри тахминан 11 миллиметр бўлган ўсимта аниқланган. Вақт ўтиши билан ўсма унинг кўриш қобилиятига жиддий таъсир кўрсатган ва даволанмаса, кўрликка олиб келиши мумкин эди.

Операция вақтида сунъий интеллект одатдагидек фақат операциядан олдинги тиббий тасвирларни таҳлил қилмади. У эндоскоп орқали узатилаётган жонли видеотасвирни реал вақтда таҳлил қилиб, жарроҳларга мия асосидаги муҳим анатомик тузилмалар — асаблар ва қон томирларини аниқлашда ёрдам берди.

Бу жуда муҳим, чунки гипофиз бези, қон томирлари ва кўриш учун масъул асаблар бир-бирига ниҳоятда яқин жойлашган. Шифокорларнинг таъкидлашича, ҳатто бир миллиметрлик хатонинг ўзи кўрлик, инсульт ёки ўлимга олиб келиши мумкин.
Сунъий интеллект хавфли ҳудудларни ажратиб кўрсатиб, жарроҳларга ўсимтанинг имкони борича катта қисмини хавфсиз олиб ташлашда ёрдам берди.

Технология Лондондаги University College London тадқиқотчилари томонидан ишлаб чиқилган бўлиб, у аввал юзлаб эндоскопик жарроҳлик видеолари асосида ўқитилган ва асосан жарроҳларни тайёрлашда қўлланилган. Энди эса технология илк бор реал операция вақтида беморга ёрдам бериш учун ишлатилди.
Операциядан кейин беморнинг кўриш қобилияти яхшиланди. У аввал юришда таянч воситаларидан фойдаланган бўлса, тикланиш жараёнида яна мустақил ҳаракатлана бошлаган ва ишига қайтди.

Мутахассислар бу усулни ҳозирча мураккаб операция вақтида шифокорга реал вақтда ёрдам берувчи восита сифатида баҳоламоқда. Шу билан бирга, ушбу операция сунъий интеллектнинг тиббиётдаги роли янги босқичга ўтаётганини кўрсатди.