Футбол юлдузи Криштиану Роналду руҳий ва жисмоний тикланиш учун кечки пайт телефон суҳбатларидан воз кечишини айтган.

“Мен учун муҳим қоидалардан бири – соат 10-11 дан кейин гаплашмайман. Телефонда ҳам гаплашмайман. Тунда гапиришни ёқтирмайман, чунки бу миямга таъсир қилади. Шунинг учун соат 10 дан кейин менга қўнғироқ қилманг”, – деган эди футболчи.

Бу иқтибос биринчи марта 2024 йил майида, Роналду WHOOP компаниясининг глобал элчиси ва сармоядори бўлган пайтда оммалашган. Компания маълумотига кўра, футболчи WHOOP қурилмасидан машғулот, уйқу ва тикланиш кўрсаткичларини кузатиш учун фойдаланади.

Роналдунинг фикрича, профессионал спортчи фақат машғулот вақтида эмас, куннинг қолган қисмида ҳам ўз танаси ва руҳий ҳолатини назорат қилиши керак. У уйқу, совуқ сув, суюқлик истеъмоли, нафас машқлари ва тикланиш жараёнларини мунтазам кузатиб боради.

Ҳозир 41 ёшда бўлган Роналду Саудия Арабистонининг “Ал-Наср” клубида фаолиятини давом эттирмоқда. Унинг клуб билан шартномаси 2027 йилгача узайтирилган.