Ўзбекистонда мобиль алоқа оператори MobiUz (Universal Mobile Systems) 100 фоиз давлат улуши билан сотилди. Бу ҳақда Давлат активларини бошқариш агентлиги матбуот хизмати хабар берди.


Агентлик маълумотига кўра, Universal Mobile Systems (MobiUz) устав капиталидаги 100 фоиз давлат улушини сотиш бўйича ўтказилган савдоларда ғолиб сифатида Америка компанияси McKim and Company бошчилигидаги консорциум таклифи эътироф этилди. Консорциум таркибига молиявий инвесторлар ҳамда соҳавий технологик ҳамкор — JVR Enterprises LLC кирган.

Таклифга кўра, MobiUz компаниясининг қиймати 351 миллион АҚШ долларига баҳоланган. Шунингдек, янги инвесторлар томонидан телекоммуникация инфратузилмасини ривожлантиришга қўшимча равишда 500 миллион долларгача инвестиция киритиш режалаштирилган.

Маълум қилинишича, ушбу маблағлар тармоқ қамровини кенгайтириш, алоқа сифати ва рақамли хизматлар кўламини оширишга йўналтирилади.


Эслатиб ўтамиз, аввалроқ хакерлар MobiUz тизимига киберҳужум уюштирилганини ва фойдаланувчилар маълумотлари қўлга киритилганини даъво қилган эди. Мобиль оператор эса киберҳужум содир этилганини тасдиқлаб, аммо абонентлар маълумотлари сизиб чиқмаганини маълум қилган.

Ўзбекистонда мобиль алоқа хизмати илк бор 1990-йиллар ўртасида йўлга қўйилган. Энг аввалги операторлардан бири — 1996 йилда фаолият бошлаган Uzdunrobita (кейинчалик MTS бренди остида ишлаган).

MobiUz (Universal Mobile Systems) эса 2000-йиллар бошида ташкил этилган ва кейинчалик тўлиқ давлат улушига ўтган. Ҳозирги кунда бозорда фаолият юритаётган йирик операторлар қаторига Beeline Uzbekistan, Ucell ва Uzmobile ҳам киради.