Элтузар таҳририятига Андижон вилоятида суюлтирилган газ ўғирланаётгани айтилган мурожаат ва видео келиб тушди. Элтузарга видео йўллаган мурожаат муаллифи ҳолат бўйича масъул ходимлар ва туман “Ҳудудгазтаъминот” раҳбариятига нисбатан қонуний чора кўрилишини сўрамоқда.

Видео

Элтузарга Андижондан газ баллонлари билан боғлиқ шубҳали ҳолат акс этган видео келди. Мурожаат муаллифи масъул ходимларга қонуний чора кўришни сўрамоқда.

Мурожаатда иддао қилинишича, аҳолига етказилиши керак бўлган суюлтирилган газ айрим ходимлар томонидан ўзлаштирилмоқда. Муаллиф бу ҳолатни “халқнинг ризқини ўғирлаш” деб баҳолаб, масъул шахслар жиноий жавобгарликка тортилиши кераклигини таъкидлаган.

Унинг айтишича, ҳудудда аҳоли суюлтирилган газни вақтида ололмаяпти. Мурожаатда газ 60 кунлаб келмаслиги, шу вақтда айрим масъуллар эса бу вазиятдан шахсий манфаат йўлида фойдаланаётгани даъво қилинган.

“Бу ходимларга, туман ‘Ҳудудгазтаъминот’ бошлиғига чора кўрилсин. Халқнинг ризқини ўғирлаб, ўзлаштириб турганлар жавоб бериши керак. Газ 60 кунда келмайди, бу тўймас ўғрилар эса чўнтагини шишириб ётибди”, дейилади мурожаатда.

Мурожаат муаллифи ҳолат холис ўрганилиб, суюлтирилган газ тақсимоти билан боғлиқ жараён текширилишини, масъулларнинг хатти-ҳаракатларига ҳуқуқий баҳо берилишини сўраган.

Элтузар таҳририяти мазкур иддаолар юзасидан масъул ташкилотлар, жумладан, Андижон вилояти “Ҳудудгазтаъминот” тузилмаларидан изоҳ сўрайди. Ҳолат юзасидан расмий муносабат билдирилса, таҳририят уни эълон қилади.

Эслатма: мурожаатда келтирилган иддаолар ваколатли органлар томонидан текширилиши лозим. Материалда тилга олинган шахс ва ташкилотлар ўз муносабатини билдириш ҳуқуқига эга.