Футбол бўйича эркаклар ўртасидаги жаҳон чемпионати иштирокчилари сони келажакда 64 тага етказилиши мумкин. ФИФА президенти Жанни Инфантино бу масала 2026 йилги мусобақадан кейин муҳокама қилинишини билдирди.

Би-би-си хабарига кўра, жаҳон чемпионатини 64 жамоа иштирокида ўтказиш таклифи ўтган йили илгари сурилган. Инфантино 48 жамоали янги форматнинг муваффақияти ФИФАни янада кенгроқ мусобақа имкониятларини ўрганишга ундаётганини айтган.

“Бу масалаларнинг барчасини жаҳон чемпионатидан кейин кўриб чиқамиз”, – деди Инфантино Швейцариянинг Blue Sport телеканалига берган интервьюсида.

Унинг таъкидлашича, жаҳон чемпионати фақат Европа ва Жанубий Америка учун эмас, балки бутун дунё учун ўтказилиши керак.

“Ҳар бир мамлакат жаҳон чемпионатида иштирок этишни орзу қилиш имконига эга бўлиши лозим. Дунёнинг барча ҳудудларида жамоалар савияси жуда юқори ва у тобора ўсиб бормоқда”, – деди ФИФА раҳбари.

Инфантинонинг фикрича, кичик мамлакатларга жаҳон чемпионатида қатнашиш имконияти берилмаса, уларда футболни янада ривожлантириш ва рақобатбардош жамоа шакллантириш учун рағбат камаяди.

48 ЖАМОАЛИ ФОРМАТ “КАТТА МУВАФФАҚИЯТ” ДЕБ АТАЛДИ

ФИФА президенти 48 жамоа қатнашган дастлабки жаҳон чемпионатини “улкан муваффақият” деб баҳолади.

У бунга мисол сифатида Африка қитъасидан қатнашган ўн жамоанинг тўққизтаси плей-офф босқичига чиққанини келтирди.

“Аввалги жаҳон чемпионатида Африкадан атиги бешта жамоа қатнашган эди. Бу барча жамоаларни жалб қилиш ва уларга иштирок этиш имкониятини бериш қанчалик муҳимлигини кўрсатади”, – деди Инфантино.

ФИФА кенгаши жаҳон чемпионати иштирокчилари сонини 32 тадан 48 тага ошириш тўғрисидаги қарорни 2017 йилда қабул қилган.

64 жамоали формат бўйича расмий таклиф эса 2025 йил апрелида Жанубий Америка футбол конфедерацияси – КОНМЕБОЛ томонидан тақдим этилган. Таклифда 2030 йилги жаҳон чемпионатида 64 жамоа қатнашиши назарда тутилган, бироқ ҳозирча якуний қарор қабул қилинмаган.

2030 ЙИЛГИ МУСОБАҚА УЧ ҚИТЪАДА ЎТКАЗИЛАДИ

2030 йилги жаҳон чемпионатининг асосий ўйинларига Испания, Португалия ва Марокаш мезбонлик қилади.

Мусобақанинг юз йиллиги муносабати билан дастлабки уч учрашув Аргентина, Уругвай ва Парагвайда ўтказилади. Илк жаҳон чемпионати 1930 йилда Уругвайда бўлиб ўтган эди.

64 жамоали формат таклифи футбол раҳбарлари орасида жиддий баҳсларга сабаб бўлмоқда.

Европа футбол ассоциациялари иттифоқи – УЕФА президенти Александер Чеферин бу ғояни “ёмон таклиф” деб атаган. Унинг фикрича, иштирокчилар сонини янада ошириш жаҳон чемпионатининг ўзига ҳам, саралаш мусобақаларига ҳам салбий таъсир кўрсатиши мумкин.

Осиё футбол конфедерацияси президенти Шайх Салмон бин Иброҳим Ал Халифа ҳам кенгайиш футбол тақвими ва мусобақалар тизимида “тартибсизлик” келтириб чиқаришидан огоҳлантирган.

Шимолий ва Марказий Америка ҳамда Кариб ҳавзаси футбол конфедерацияси – КОНКАКАФ президенти Виктор Монтаглиани эса 64 жамоали формат “тўғри қарорга ўхшамаслиги”ни айтган.

Унинг фикрича, бундай кенгайиш халқаро футболнинг умумий тизимига, жумладан, қитъавий мусобақалар ва саралаш ўйинларига зарар етказиши мумкин.

АҚШ 2038 ЙИЛГИ МУНДИАЛГА ҚИЗИҚИШ БИЛДИРДИ

Шу билан бирга, Оқ уйнинг жаҳон чемпионати бўйича ишчи гуруҳи ижрочи директори Эндрю Жулиани АҚШ 2038 йилги жаҳон чемпионатига мезбонлик қилиш учун ариза бериш имкониятини кўриб чиқиши мумкинлигини айтди.

Унинг сўзларига кўра, агар мусобақа 64 жамоагача кенгайтирилса ҳам, АҚШ бундай йирик турнирни ўтказиш имкониятига эга.

ФИФАнинг расмий позициясига кўра, ташкилот кенгайиш бўйича барча таклифларни манфаатдор томонлар билан муҳокама қилиши ва ФИФА кенгаши аъзоларидан тушган ташаббусларни кўриб чиқиши шарт.

Якуний қарор ФИФА кенгаши томонидан қабул қилинади. Бироқ ҳозирча 64 жамоали формат яқин вақт ичида тасдиқланишига ишора қилувчи белгилар йўқ.