2026 йилги жаҳон чемпионатида баҳсли ҳакамлик қарорлари яна ФИФАни халқаро танқидлар марказига олиб чиқди. Бу сафар баҳслар марказида Аргентина – Миср, Сенегал – Белгия ўйинлари бўлмоқда.

Месси ва Роналдуни қиёсловчи бачканалар, таҳлилни ўқимай нари кетаверсин. Зотан, масала бу иккиси ҳақида эмас.

Аргентина-Миср учрашувида VAR орқали бекор қилинган гол, берилмаган эҳтимолий пенальти ва баҳсли қарорлар нафақат жаҳон ОАВ ва футбол экспертларининг кескин муносабатига сабаб бўляпти.

Reuters ёзишича, Миср футбол федерацияси ҳакамлик ва VAR шаффофлигига эътироз билдириб, бош ҳакам устидан ФИФАга расмий шикоят киритган. Федерация айрим қарорлар учрашув тақдирига бевосита таъсир қилганини таъкидламоқда.

The Guardian ҳам ўйиндан кейинги асосий мавзу айнан ҳакамлик бўлганини қайд этди. Нашрда Мисрнинг бекор қилинган голи ва пенальти бўйича эътирозлари жаҳон чемпионатидаги энг катта баҳслардан бири сифатида тилга олинган.

Al Jazeera эса бу ҳолатни алоҳида таҳлил қилиб, айрим экспертлар мусобақанинг қонунийлиги ва ишончлилиги ҳақида савол қўяётганини ёзди. Бироқ нашр ҳеч қандай манипуляция ёки келишилган ўйинни тасдиқловчи далиллар мавжуд эмаслигини ҳам алоҳида қайд этади.

TRT World таҳлилида асосий эътироз VAR қарорларининг бир хил мезон асосида қўлланмаётганига қаратилган. Экспертлар Мисрнинг голини бекор қилиш учун VAR узоқроқ эпизодни текширгани, аммо Аргентина фойдасига ҳал қилувчи вазиятда шундай чуқур таҳлил амалга оширилмаганини мисол қилиб келтирган.

Шу билан бирга, айрим шарҳловчилар ва собиқ футболчилар ФИФА айрим юлдуз жамоаларга нисбатан ён босаётгани ҳақида тахминларни ҳам илгари суришди. Бироқ бу фикрлар ҳозирча далиллар билан тасдиқланган эмас ва расмий текширувлар ҳам бундай хулосага келмаган.

Мутахассислар фикрича, бу баҳслар бир жамоа ҳақида эмас, балки футболда ҳакамлик тизимига бўлган ишонч ҳақидадир. VAR инсон хатосини камайтириш учун жорий этилган бўлса-да, қарорларнинг изоҳланмаслиги ва бир хил вазиятларга турлича ёндашув танқидларни янада кучайтирмоқда.

Марокаш–Франция ўйини олдидан аргентиналик ҳакамлар бригадаси тайинлангани мухлислар орасида катта баҳс уйғотди. Танқидчилар бундай тайинлов эҳтимолий манфаатлар тўқнашуви тасаввурини келтириб чиқаришини айтмоқда. The Guardian ва Goal бу ҳолат Франция–Аргентина рақобати фонида саволлар туғдирганини ёзди.

Марокаш мухлислари учун бу янги мавзу эмас: 2022 йилги Францияга қарши ярим финалда ҳам икки пенальти эпизоди бўйича эътирозлар бўлган ва Марокаш федерацияси FIFAга шикоят қилган эди.

Инфантинога қаратилган саволлар кўпаймоқда. Бир томондан, бу Кичик Шаҳзода чемпионатда кўпроқ жамоалар иштирок этишига изн бериб кўплар қатори Ўзбекистоннинг ҳам тарихий юришини таъминлади. Бошқа томондан, VAR ва ҳакамлик қарорлари очиқдан-очиқ ноҳақликларга ишора қиляпти.