Ўзбекистон миллий терма жамоасининг АҚШдаги чемпионатда иштирокидан кейин ижтимоий тармоқларда фан-клуб фаолияти ва мухлислар учун ташкил этилган сафарлар атрофида кескин муҳокамалар бошланди.

Хусусан, бир қатор мухлислар Ўзбекистон миллий терма жамоаси расмий фан-клуби раҳбари Абдураҳмон Фозилов иштирокида ташкил этилган сафарлар нархи, хизматлар сифати ва ташкилий масалалар юзасидан норозилик билдиришди.

Айрим фойдаланувчилар Қатардаги сафарлар даврида ҳам шунга ўхшаш эътирозлар бўлганини таъкидлашяпти.

Ижтимоий тармоқларда тарқалган пост ва изоҳларда сафар хизматлари қиймати юқори белгилангани, айрим хизматлар воситачилар орқали қимматроқ таклиф қилингани ҳақида даъволар кўпайди.

Ушбу иддаолар ҳозирча расмий органлар ёки мустақил текширувлар томонидан тасдиқлангани ҳақида маълумот йўқ.

Абдураҳмон Фозилов узоқ йиллардан буён Ўзбекистон фан-клуби фаолияти билан шуғулланиб келади.

У аввал халқаро спорт мусобақаларида мамлакат мухлисларига бошчилик қилгани ва турли сафарларни ташкил этгани ҳақида маълумотлар мавжуд.

Айни пайтда мухлислар жамоатчилик олдида сафарларни ташкил этиш тартиби, нархларни шакллантириш механизми ҳамда кўрсатилган хизматлар бўйича очиқ ва батафсил изоҳ берилишини талаб қиляпти.

Ҳозирча эътирозлар юзасидан Абдураҳмон Фозилов ёки масъул ташкилотлар расмий муносабат билдиришмади.