Amazon асосчиси, дунёнинг энг бой одамларидан бири Жефф Безос сунъий интеллект одамларни ишсиз қолдириши ҳақидаги хавотирларга қўшилмаслигини билдирди. Унинг фикрича, AI аксинча инсон меҳнатига бўлган эҳтиёжни оширади ва янги иш ўринлари пайдо бўлишига сабаб бўлади.

Безос бу ҳақда Парижда ўтказилган VivaTech технология анжуманида сўзлаган чиқишида айтди. У сунъий интеллект келажакда катта миқдорда ходимларнинг ўрнини босиши мумкинлиги ҳақидаги қарашларни рад этди.

“Кўпчилик, жумладан, жуда ақлли одамлар ҳам сунъий интеллект инсонларни кераксиз қилиб қўйишидан хавотирда эканини биламан. Мен бу фикрга мутлақо қўшилмайман. Аксинча, сунъий интеллект меҳнат бозорида ишчи кучи тақчиллигини келтириб чиқаради, деб ўйлайман”, деди Безос.

Унинг таъкидлашича, инсонларни чеклаб турган асосий омиллар орзу ёки мақсад етишмаслиги эмас, балки технологиялар ёрдамида бартараф этилиши мумкин бўлган тўсиқлардир. Безос сунъий интеллект жамиятда янги имкониятларни очиши, ишлаб чиқариш ва хизмат кўрсатиш соҳаларида самарадорликни ошириши мумкинлигини айтди.

Безос айни пайтда Prometheus номли янги AI лойиҳаси устида ишламоқда. Ушбу лойиҳа жисмоний ишлаб чиқариш жараёнларини тезлаштиришга қаратилган бўлиб, мазкур соҳа тобора автоматлашиб бормоқда.

Бироқ бу қарашларга ҳамма ҳам қўшилаётгани йўқ. Буюк Британия Касаба уюшмалари конгресси сунъий интеллект нотўғри жорий этилса, деиндустриализация давридаги салбий оқибатлар такрорланиши мумкинлигидан огоҳлантирган. Уюшмага кўра, AI сабаб акциядорлар янада бойиб, ишчиларнинг меҳнати эса қадрсизланиши ёки айрим иш ўринлари йўқолиши мумкин.

Шу билан бирга, касаба уюшмалари сунъий интеллект тўғри йўналишда ривожлантирилса, ишчилар ҳам ундан фойда кўриши, меҳнат унумдорлигининг ошиши эса жамият учун ижобий натижа бериши мумкинлигини таъкидламоқда.

Безос анжуманда космосни ўзлаштириш бўйича узоқ муддатли режалари ҳақида ҳам гапирди. Унинг айтишича, инсоният Ойга “шунчаки бориб қайтиш” учун эмас, балки у ерда доимий қолиш учун ҳаракат қилмоқда.

“Биз Ойга меҳмон сифатида эмас, у ерда қолиш учун борамиз”, деди Безос.

У Ой инсониятнинг Ердан ташқаридаги илк доимий базасига айланиши мумкинлигини таъкидлади. Безосга кўра, Ойнинг яқинлиги ва табиий ресурслари уни келажакда космосни ўзлаштириш учун муҳим нуқтага айлантиради. Масалан, электролиз каби технологиялар орқали Ойдаги ресурслардан ракета ёқилғиси олиш ва доимий инфратузилма яратиш мумкин бўлади.

Анжуманда Безос асос солган Blue Origin космик компанияси фаолияти ҳам муҳокама қилинди. Компаниянинг New Glenn ракетаси май ойида Флоридадаги Кейп-Канавералда синов вақтида портлаб кетган эди. Безос бу ҳодисани жамоа учун “оғир зарба” деб атади, бироқ муҳим инфратузилманинг сақлаб қолинганини ижобий ҳолат сифатида баҳолади.

Blue Origin бош директори Дэйв Лимпнинг айтишича, старт майдончасида тиклаш ишлари бошланган ва компания йил охиригача парвозларни қайта йўлга қўйишни режалаштирмоқда.

VivaTech анжуманида робототехника соҳасидаги янгиликлар ҳам катта қизиқиш уйғотди. Айниқса, Unitree компаниясининг инсонсимон роботи томошабинлар эътиборини тортди. Робот Франциянинг HABS нейро-AI компанияси технологияси билан биргаликда намойиш қилинди.

Намойишда инсон мия фаолияти орқали роботга буйруқ бериш имконияти кўрсатилди. Бунинг учун бошга электроэнцефалограмма, яъни EEG датчиклари ўрнатилган махсус тасма тақилди. Робот мия фаолияти орқали шаклланган сигналларга жавоб қайтарди.

Ташкилотчиларга кўра, бу каби технологиялар келажакда инсон ва машиналарнинг янада яқин ҳамкорликда ишлашига йўл очиши мумкин.

Анжумандаги умумий манзара шуни кўрсатдики, сунъий интеллект энди фақат чатботлар билан чекланиб қолмаяпти. У ишлаб чиқариш, тиббиёт, меҳмонхона хизмати, робототехника ва космос соҳаларига тобора чуқур кириб бормоқда.