Украина президенти Владимир Зеленский Беларус раҳбари Александр Лукашенкога Россиянинг Украинага ҳужумларида фойдаланилаётган ускуналарни ўз ҳудудидан олиб чиқиш учун бир ҳафта етарли бўлишини айтди. У акс ҳолда Украина ўзи ҳаракат қилишини билдирди.

Зеленский жума куни Киевда ўтказилган матбуот анжуманида Беларуснинг Украина билан чегарадош икки вилоятида сигнални қайта узатиш станциялари жойлашганини айтди. Унинг сўзларига кўра, Россия кучлари бу ускуналардан Украинадаги тинч аҳолига қарши ҳужумлар пайтида қуролларни йўналтиришда фойдаланмоқда.

“Лукашенко урушда қатнашишни истамаслигини айтишининг маъноси нима? У бу ускуналарни олиб ташласин, ўчирсин. Менимча, бунинг учун бир ҳафта етарли”, деди Зеленский.

Украина президенти, агар Минск бу талабни бажармаса, Киев ўзи чора кўришини ҳам айтди.

“Агар у буни қилмаса, биз қиламиз”, деди Зеленский. У қандай ҳаракат назарда тутилаётганига аниқлик киритмади.

Зеленский шунингдек Беларуснинг нефть қайта ишлаш соҳаси ҳақида ҳам гапирди. Унинг айтишича, Беларусь Россия армияси учун муҳим таъминот манбаларидан бирига айланган.

“Бугун у Россия армиясининг асосий ёки асосий таъминотчиларидан бири. Айнан Лукашенко, айнан Беларусь. Буни тўхтатиш мумкинми? Ишончим комил, бу унинг қўлидан келади. Буни у назорат қилмоқда”, деди Украина президенти.

Киев сўнгги ойларда Россиянинг нефть секторига зарбаларни кучайтирган. Украина бу орқали Москванинг уруш олиб бориш имкониятларига босим ўтказишни мақсад қилганини билдирмоқда.

Зеленский бир неча ойдан буён Россия Беларусни Украинага қарши урушга янада чуқурроқ тортишга уринаётганини айтиб келади. 2022 йил февраль ойида Россия Украинага кенг кўламли босқинни бошлаганида, рус қўшинлари Беларус ҳудудидан ҳам фойдаланган эди.

Лукашенко эса сўнгги баёнотларида Минск урушга тортилмаслигини, аммо Беларусга қарши тажовуз бўлса, Россия билан бирга ўзини ҳимоя қилишини айтган. У Al Arabiya телеканалига берган интервьюсида Украина Беларусдан қўрқмаслиги кераклигини ва урушни тугатиш учун томонлар муросага келиши лозимлигини таъкидлаган.

Беларус мухолифати етакчиси Светлана Тихановская Зеленскийнинг кескин огоҳлантиришини қўллаб-қувватлади. Унинг айтишича, Лукашенко тинчликни истаса, буни сўз билан эмас, амалий ҳаракатлар билан кўрсатиши керак.

Тихановская Лукашенкони Россия агрессиясини қўллаб-қувватлашни тўхтатишга, сиёсий маҳбусларни озод қилишга ва беларус халқи билан ҳақиқий мулоқот бошлашга чақирди.

Беларус Ғарб давлатлари томонидан инсон ҳуқуқлари бузилиши ва мухолифатга босимлар сабаб узоқ йиллардан бери танқид қилиб келинади. 2020 йилги президент сайловидан кейин мамлакатда минглаб намойишчилар ҳибсга олинган, мухолифат ва Ғарб давлатлари эса ўша сайлов натижаларини сохталаштирилган деб баҳолаган.

Минск Украинадаги уруш давомида Москванинг энг яқин иттифоқчиларидан бири бўлиб қолмоқда. Россия дронлари Украинага ҳужумлар пайтида Беларус ҳудуди орқали ўтгани айтилган, Минск эса Россиянинг “Орешник” ўрта масофали гипертовушли баллистик ракета тизими Беларусда жойлаштирилганини билдирган. Май ойида икки давлат ядровий машғулотлар ҳам ўтказган.