Украина президенти Владимир Зеленский Россия президенти Владимир Путиннинг Донецк вилоятидаги Константиновка шаҳри Россия қўшинлари томонидан тўлиқ эгаллангани ҳақидаги баёнотини ёлғон деб атади. Зеленский Путинни, агар шаҳар ҳақиқатан ҳам Россия назоратида бўлса, у ерда учрашишга чақирди.

Аввалроқ Путин Константиновка “озод қилингани”ни иддао қилиб, бу Россия армиясига Краматорск, Славянск ва Донбассдаги бошқа мустаҳкамланган ҳудудлар томон ҳаракатланиш учун “тўғридан-тўғри йўл” очишини айтган эди.

Зеленский ўз Telegram-каналида Путин АҚШ Мустақиллик куни арафасида дунё ва АҚШ президентини фронтдаги вазият бўйича чалғитишга уринаётганини ёзди.

“Путин дунёга ва Америка президентига фронтдаги вазият ҳақида ёлғон гапиришга қарор қилди: у Донбассдаги Константиновкани россияликлар эгаллаганини даъво қилмоқда. Албатта, бу ҳақиқат эмас – бу Россиянинг навбатдаги ёлғони”, деди Зеленский.

Украина президентининг таъкидлашича, агар Константиновка Россия назоратида бўлса, Путин у ерда у билан учрашиш ва урушни тугатиш учун дипломатик ечимларни муҳокама қилишда муаммо кўрмаслиги керак.

“Аммо у фронт чизиғини кесиб ўтмайди: ҳақиқат Путиннинг сўзларидан жуда фарқ қилади”, деди Зеленский.

Кремл томонидан Зеленскийнинг ушбу чақириқларига ҳозирча расмий жавоб берилмади. Бироқ Россияпараст Z-военкорлар ва ҳарбий блогерлар зудлик билан Путинни ҳимоя қилишга киришди.

“Комсомольская правда” ҳарбий мухбири Александр Коц бундай учрашувни “иссиқ фронт ҳудудида” тасаввур қилиш қийинлигини айтди.

Унинг фикрича, Россия президенти фронтдаги Константиновкага борса, унга қарши “учиши мумкин бўлган ҳамма нарса” ишлатилиши мумкин.

Яна бир Z-блогер Анатолий Радов эса Зеленский Путинни “заиф жойидан ушлашга” уринаётганини иддао қилди.

Унинг ёзишича, агар Константиновка Украина назоратида бўлса, “учрашувни қабул қилувчи томон” аввал ўзи шаҳарга бориши керак.

Мустақил OSINT-лойиҳалар маълумотларига кўра, Константиновканинг Россия қўшинлари томонидан тўлиқ эгаллангани ҳақидаги иддаолар тасдиқланмаган.

Очиқ хариталарда шаҳарнинг айрим қисмлари ва атрофида жанглар давом этаётгани кўринади.

Шу билан бирга, Украина манбалари ҳам Константиновка йўналишидаги вазият оғирлигини тан олмоқда. Донецк вилоятидаги ушбу шаҳар Краматорск-Славянск мудофаа йўналиши учун муҳим нуқталардан бири ҳисобланади.