Украина президенти Владимир Зеленский ўз расмий сайтида Владимир Путинга йўлланган кенг қамровли очиқ мактубни эълон қилди. Унда Зеленский Украина Россия учун уруш нархини кескин ошириш имкониятига эга эканини таъкидлаб, ҳарбий ҳаракатларни тугатиш мақсадида Путинни шахсий учрашув ўтказишга чақирган.

Мактубда Зеленский «уруш Россияга тобора кўпроқ салбий оқибатлар келтирмоқда» дея қайд этади. Унинг сўзларига кўра, Россия аҳолисига «украин дронлари ва ракеталари», бензин танқислиги, доимий тақиқлар ҳамда сафарбарлик ўтказиш режалари ёқмаяпти.

Зеленский разведка маълумотларига таяниб, май ойида Украина фронтида 30 минг нафар россиялик ҳарбий ҳалок бўлгани ёки оғир яраланганини билдирди. Унинг таъкидлашича, бундай кўрсаткич бир неча ойдан буён сақланиб келмоқда.
Шунингдек, Зеленский Россия йўқотишларининг 63 фоизи ҳалок бўлганлар, 37 фоизи эса яраланганлар ҳиссасига тўғри келишини маълум қилди.

«XXI асрда армиялар бундай нисбатга йўл қўя олмайди. Кейинчалик ҳалок бўлганлар улуши янада ортади», — деган Зеленский.

Украина раҳбари Путинни нейтрал давлатлардан бирида шахсан музокара ўтказишга чақириб, жангларни тўхтатиш ва ҳозирги фронт чизиғи бўйлаб сулҳ ўрнатишни таклиф қилди.
Шу билан бирга, Зеленский Москвага боришдан яна бош тортган. Россия расмийлари аввалроқ Украина ва Россия президентлари ўртасидаги тўғридан-тўғри музокаралар Москвада ўтказилиши мумкинлигини билдирган эди.