Украина президенти Владимир Зеленский Киевда ёпиқ учрашув ўтказиб, унда 2026 йил кузида президентлик сайловини ўтказиш эҳтимоли муҳокама қилинган. Бу ҳақда «Украинская правда» нашри ўз манбаларига таяниб хабар берди.

Нашр маълумотига кўра, учрашувда иштирок этиши учун Украина Қуролли кучларининг собиқ Бош қўмондони, ҳозирда Украинанинг Буюк Британиядаги элчиси бўлиб ишлаётган Валерий Залужний Лондондан Киевга чақиртирилган. Манбаларнинг таъкидлашича, унга сафар учун расмий сабаб сифатида Британия бош вазири Кир Стармернинг эҳтимолий истеъфоси муҳокама қилиниши айтилган.

Учрашувда, шунингдек, Президент офиси раҳбари ўринбосари Кирилл Буданов, унинг ўринбосари Олег Татаров, «Халқ хизматкори» фракцияси раҳбари Давид Арахамия, мудофаа вазири Михаил Федоров ҳамда Миллий хавфсизлик ва мудофаа кенгаши котиби Рустем Умеров иштирок этгани айтилмоқда.

Манбаларга кўра, Зеленский жамоаси Залужнийни эҳтимолий президентлик сайловида иштирок этмасликка кўндиришга ҳаракат қилган. Улар жамиятда бўлиниш юзага келиши, сайлов кампанияси кескин тус олиши ва давлат хавфсизлигига хавф туғилиши мумкинлигини асос сифатида келтирган.

Нашрнинг ёзишича, Зеленский Залужнийдан агар сайлов 2026 йил кузида ўтказилса, номзодини қўядими, деб тўғридан-тўғри сўраган. Залужний эса:

«Ҳа. Қатнашаман», — деб жавоб берган.

Манбаларнинг таъкидлашича, Зеленский Залужнийга деярли исталган давлат лавозимини таклиф қилишга тайёр, аммо ушбу жавобдан сўнг бундай таклиф билдирилмади.

Учрашувда Президент офиси буюртмаси билан ўтказилган ижтимоий сўров натижалари ҳам муҳокама қилинди. Унга кўра, ҳозирги кунда Зеленскийни қўллаб-қувватлаш даражаси 34%, Валерий Залужнийники 28%, Кирилл Будановники эса 12%**ни ташкил этади.