АҚШ президенти Дональд Трамп Россия президенти Владимир Путин билан қарийб 90 дақиқа телефон орқали суҳбатлашиб, Украинадаги урушга ечим топишда ёрдам беришга тайёрлигини билдирган.

Бу ҳақда Кремль ёрдамчиси Юрий Ушаков маълум қилди, деб хабар берди Reuters.

Ушаковнинг айтишича, Трамп бу таклифни келаси ҳафта Туркияда бўлиб ўтадиган НАТО саммитидаги иштироки контекстида билдирган.

Унинг сўзларига кўра, АҚШ президенти “жангларни тезроқ тўхтатиш ва инқироздан чиқиш йўлларини топиш” учун ишлашга тайёрлигини яна бир бор тасдиқлаган.

Кремль вакили Россия можарони “сиёсий-дипломатик йўл билан”, Москва ўзининг “асосий ёндашувлари” инобатга олинган ҳолда ҳал этиш тарафдори эканини айтди.

Шу билан бирга, Ушаков Киев ва унинг европалик иттифоқчиларини можарони чўзиш ва кескинлаштиришга уринаётганликда айблади.

У бу гаплари билан Украина томонидан Россия ҳудудидаги, асосан нефть саноати билан боғлиқ объектларга уюштирилаётган узоқ масофали зарбаларни назарда тутган.

Ушаков Трампнинг АҚШ вакиллари Стив Уиткофф ва Жаред Кушнер тинчлик келишувига эришиш бўйича ҳаракатларни давом эттириши ҳамда яна Москвага боришга тайёр эканини айтганини келтирди.

Кремль вакилига кўра, Путин суҳбат давомида фронтдаги вазиятни ҳам тасвирлаб, Россия қўшинлари олдинга силжиётганини иддао қилган.

Ушаков Путин Россия армияси “бир аҳоли пунктидан кейин бошқасини озод қилаётганини” айтганини билдирди.

Россия ҳарбий қўмондонлари жума куни Путинга Донецк вилоятидаги стратегик аҳамиятга эга Константиновка шаҳри эгалланганини маълум қилган эди.

Аммо шанба куни Украина президенти Владимир Зеленский ва Украина Бош штаби бу даъвони рад этиб, шаҳар ҳали ҳам Украина кучлари назоратида эканини билдирди.