АҚШ президенти Дональд Трамп ва Россия президенти Владимир Путин Россия дизель ёқилғисини Америка ҳамда жаҳон бозорига қайтариш бўйича келишувга эришди. Бу ҳақда Axios нашри америкалик амалдорга таяниб хабар бермоқда.

Манбага кўра, Вашингтон Украинадан Россиянинг нефтни қайта ишлаш заводларига зарбаларни тўхтатишни бир неча бор сўраган. Бироқ Киев ҳужумларни давом эттирмоқда.

АҚШ маъмурияти бундай зарбалар Россия билан бирга Американинг ҳам иқтисодий манфаатларига зарар етказаётганини билдирди.

Зеленский Россия Украина электр станцияларига ҳужумларни тўхтатса, Киев ҳам нефтни қайта ишлаш заводларига зарба беришдан воз кечишга тайёрлигини таъкидлаяпти. Трамп эса Украинадан ҳужумларни бир томонлама тўхтатишни талаб қилмоқда.

Украина президенти Трамп ва Путин ўртасидаги келишувни «Путинга совға» ҳамда «урушга инвестиция» деб атади.

Жорий йил март ойидан бошлаб жаҳон бозорида дизель ёқилғиси нархи кескин кўтарилди. Бунга АҚШ ва Исроилнинг Эронга зарбалари, Ҳурмуз бўғозидаги чекловлар ҳамда Россиянинг июль ойида дизель экспортини тақиқлаши таъсир кўрсатди.

Трамп ёқилғи нархининг ошишини Яқин Шарқдаги вазиятдан кўра Россия ва Украина ўртасидаги уруш билан изоҳлади.

Маълумотларга кўра, келишув ортидан биржаларда дизель ёқилғиси нархи тахминан 5 фоизга пасайди. Россия эса дизель экспортига қўйилган тақиқни босқичма-босқич бекор қилишни бошлади.