АҚШ президенти Доналд Трамп Эрон билан урушни тўхтатиш ва стратегик аҳамиятга эга Ҳурмуз бўғозини қайта очиш бўйича меморандум деярли келишиб олинганини маълум қилди. Унинг айтишича, Покистон воситачилигида олиб борилаётган музокаралар ҳал қилувчи босқичга кирган.

Трамп Truth Social тармоғида ёзган баёнотида келишувнинг сўнгги жиҳатлари муҳокама қилинаётгани ва тез орада расман эълон қилиниши мумкинлигини билдирди.

Ҳурмуз бўғози феврал ойида АҚШ ва Исроилнинг Эронга қарши ҳарбий ҳаракатлари ортидан ёпилган эди. Бу эса жаҳон энергетика бозорида жиддий инқирозни келтириб чиқариб, нефть нархлари кескин ошишига сабаб бўлди. Айни пайтда Brent нефти нархи уруш бошланган даврга нисбатан қарийб 43 фоизга юқори сақланмоқда.

Оммавий ахборот воситалари тарқатган маълумотларга кўра, эҳтимолий меморандум урушни тугатиш, АҚШнинг Эрон денгиз ташувларига қўйган чекловларини юмшатиш ва Ҳурмуз бўғозида ҳаракатни қайта тиклаш учун ҳуқуқий асос яратади.

Шу билан бирга, Эроннинг юқори даражада бойитилган уран захираси масаласи алоҳида музокара мавзуси бўлиб қолмоқда. Хабарларга кўра, бу бўйича 30-60 кун ичида қўшимча келишувлар муҳокама қилиниши мумкин.

Эрон расмийлари музокараларда ижобий силжиш борлигини тан олган бўлса-да, барча масалалар ҳали тўлиқ ҳал этилмаганини билдирмоқда. Tasnim агентлиги айрим бандлар бўйича келишмовчилик сақланиб қолаётганини хабар қилди.

Агар келишув амалга ошса, бу нафақат Яқин Шарқдаги можарони юмшатиши, балки ёқилғи ва озиқ-овқат нархларига таъсир кўрсатган глобал энергетика инқирозини ҳам енгиллатиши мумкин.