Қора денгизда «Афрамакс Рио» танкеридаги ёнғиндан сўнг катта нефть доғи пайдо бўлди. Greenpeace сунъий йўлдош тасвирлари таҳлилига таяниб, ифлосланган ҳудуд майдони қарийб 25 квадрат километрга етганини маълум қилди.

Ташкилотга кўра, 7 октябрь куни танкер ортидан чўзилган нефть маҳсулотлари изи тахминан 8 квадрат километрни ташкил этган, кейинги сунъий йўлдош тасвирида эса доғ майдони 25 квадрат километргача кенгайган.

Россия Транспорт вазирлиги 6 октябрь куни Сочи соҳиллари яқинида «Афрамакс Рио» танкери учувчисиз катерлар ҳужумига учрагани ва ундаги нефть ёнганини хабар қилди. Бироқ вазирлик кейинчалик акватория нефть билан ифлосланмаганини билдирди.

Сочи ва Сириусда вақтинча ёпилган пляжлар 8 октябрь куни қайта очилди. Маҳаллий ҳокимият денгиз суви намуналари меъёрга мувофиқ экани ва космик мониторингда нефть доғлари аниқланмаганини маълум қилди.

Greenpeace маълумотлари билан Россия расмий идораларининг баёнотлари бир-бирига зид келмоқда. Қай бирига ишонишни ўзингиз биласиз.