Япониянинг Акита префектураси томонидан 2012 йилда Россия президенти Владимир Путинга совға қилинган Акита зотдор ити – Юмэ ёшини яшаб, ошини ошаб ўлди.

Юмэ 2011 йилда рўй берган Буюк Шарқий Япония зилзиласи ва цунами фожиасидан кейин Россия кўрсатган ёрдам учун миннатдорлик рамзи сифатида Путинга ҳадя этилган эди. Бу эҳтиёткор дипломатия даврининг, аммо самимий туҳфаси сифатида қабул қилинди.

Ит йиллар давомида Путиннинг расмий қароргоҳида яшади. 2014 йилда у Сочида бўлиб ўтган саммитда Япония бош вазири Синдзо Абэни қарши олган эди. 2016 йилда эса Кремлдаги интервью чоғида япон журналистларга қараб ҳуриган эди. Ўшанда Путин кулиб, унга ширинлик берган ва Юмэни “муросасиз ит” деб таърифлаганди.

Кейинчалик Украина можароси ортидан Япония ва Россия муносабатлари совий бошлагач, Юмэ ҳам омма назаридан деярли йўқолди. Суратлар ҳам, расмий янгиликлар ҳам чиқмади. Кремл фақат вақти-вақти билан унинг “соғлом, шўх ва президентни хурсанд қилиб юргани” ҳақида қисқа маълумот бериб турарди.

2012 йил апрелида туғилган Юме ўтган ой 14 ёшга тўлиши керак эди.

Икки давлат ўртасида кўприк бўлиш умидида юборилган кучукча, охир-оқибат, уни дунёга келтирган дўстликдан ҳам узоқроқ умр кўрди.