Эрон президенти Масъуд Пезешкиён “Ровиёни Эрон” форумида кескин ва ҳиссий баёнот билан чиқиш қилди. Жамоатчилик билан алоқалар кунига бағишланган тадбирда давлат раҳбари АҚШ ва Исроилни қаттиқ танқид қилиб, уларни қирғин ва халқаро ҳуқуқни бузишда айблади.

Пезешкиён ўз нутқида Эронга қарши амалга оширилган сўнгги ҳужумлар ва юқори лавозимли шахсларнинг ҳалок бўлиши ҳақида тўхталиб, халқаро ташкилотларни иккиюзламачиликда айблади.

“Мен инсон сифатида ҳам, расмий шахс сифатида ҳам ҳеч қандай ҳолатда ва ҳеч қайси давлат олдида бош эгмайман”, – деди Эрон президенти қатъий оҳангда.

Президентнинг таъкидлашича, ташқи кучлар “хиёнаткорона ва қўрқоқларча” руҳоний етакчилар, эронлик қўмондонлар, вазирлар ва олимларни йўқ қилган эса-да, бу жараёнда халқаро ҳуқуқ ва инсон ҳуқуқлари тўлиқ эътиборсиз қолдирилди.

Пезешкиён Ғарб давлатларини инсонпарварлик ҳақида гапириб, бир вақтнинг ўзида эронлик болаларнинг ҳалок бўлишига бефарқ қараётганликда айблади.

Шунингдек, у Ғазо сектори ва Фаластиндаги воқеаларни эслаб, Исроил ҳаракатларини кескин қоралади.

“Ғазо ва Фаластинга қаранг – у ерда содир этилаётган даҳшатли жиноятларни кўринг. Америка оммавий ахборот воситалари эса бу қирғинни “ўзини ҳимоя қилиш” деб оқламоқда. Улар буни фақат куч ва ҳокимиятга эга бўлгани учун қилмоқда. Тирик виждонга эга ҳеч бир инсон буюк давлатнинг келиб, бомба билан бегуноҳ болаларни парчалаб ташлашини қабул қила олмайди”, – деди Пезешкиён.

Эрон президенти нутқи давомида мамлакат ташқи босимларга қарамасдан ўз сиёсий позициясидан чекинмаслигини таъкидлади.