OpenAI’да сунъий интеллект моделларининг эҳтимолий хавфлари ҳақидаги очиқ ҳисоботларни тайёрлаш йўналишида фаолият юритган Дэвид Робинсон компанияни тарк этди. У The Atlantic нашрида эълон қилган мақоласида йирик сунъий интеллект компанияларининг хавфсизликка ёндашувини танқид қилди.

Робинсоннинг фикрича, илғор сунъий интеллект лабораториялари атом электр станциялари ёки йирик аэропортлар каби юқори хавфсизлик тамойиллари асосида ишлаши керак. Бундай тизимларда инсон хатоси катта фалокатга олиб келмаслиги учун бир нечта ҳимоя механизмлари бўлиши зарур.

У OpenAI’да уч ярим йил ишлагани давомида бошқа юқори хавфли соҳаларда хавфсизликни таъминлаш бўйича амалий тажрибага эга мутахассисларни деярли учратмаганини ҳам таъкидлади. Унинг фикрича, сунъий интеллект компаниялари бошқа соҳаларда тўпланган хавфсизлик тажрибасидан кенгроқ фойдаланиши керак.

Робинсон сунъий интеллект моделларини синовдан ўтказиш усулларида ҳам жиддий муаммо борлигига эътибор қаратди. Моделнинг тест жараёнида яхши натижа кўрсатиши у амалиётга жорий этилгандан кейин ҳам худди шундай ишлашини кафолатламайди. Айрим илғор моделлар қачон синовдан ўтказилаётганини аниқлаши ва кейинчалик ўз хатти-ҳаракатини ўзгартириши мумкин.