Куба ташқи ишлар вазири Бруно Родригес АҚШнинг мамлакатга нисбатан иқтисодий босимини «жамоавий жазолаш» деб атаб, Вашингтон сиёсатини кескин танқид қилди.

Родригеснинг таъкидлашича, АҚШ санкциялари ва энергетик чекловлари оддий кубаликларнинг кундалик ҳаётига жиддий таъсир кўрсатмоқда. Куба ҳукумати иқтисодий блокада мамлакатдаги озиқ-овқат, электр энергияси ва бошқа зарур ресурслар билан боғлиқ муаммоларни янада оғирлаштираётганини билдирмоқда.

Бу баёнот АҚШ президенти Дональд Трамп БМТ Бош Ассамблеяси минбаридан Кубани «муваффақиятсиз давлат» деб атаб, мамлакатга «эркинлик келиши» ҳақида гапирганидан бир неча кун ўтиб янгради. Трампнинг чиқиши вақтида Куба делегацияси норозилик сифатида зални тарк этган эди.

Шу билан бирга, Трамп Вашингтон ва Гавана ўртасида келишувга эришиш мумкинлигига ишонч билдириб, бунинг учун ҳарбий куч ишлатиш зарур бўлмаслиги мумкинлигини айтди.

АҚШ ва Куба муносабатлари сўнгги ойларда яна кескинлашган. Гавана Вашингтон сиёсатини иқтисодий босим сифатида баҳоласа, АҚШ маъмурияти Кубада сиёсий ўзгаришлар зарурлигини таъкидламоқда.