Куба президенти Мигел Диас-Канел душанба куни АҚШнинг Кубага қарши ҳар қандай ҳарбий ҳаракати “қонли қирғин”га олиб келишини ва бу минтақавий тинчлик ҳамда барқарорлик учун ҳисоблаб бўлмас оқибатларга сабаб бўлишини айтди.

“Куба ҳеч кимга таҳдид солмайди,” деб ёзди Диас-Канел X ижтимоий тармоғида.

Бу баёнот Axios нашри якшанба куни эълон қилган хабар ортидан янгради. Унда махфий разведка маълумотларига таяниб, Куба 300 дан ортиқ ҳарбий дрон сотиб олгани ва улардан Гуантанамо базаси, АҚШ ҳарбий кемалари ҳамда Флориданинг Ки-Уэст ҳудудига қарши фойдаланиш режаларини муҳокама қилгани айтилган. Куба эса бу айбловларни рад этиб, Вашингтонни эҳтимолий ҳарбий аралашув учун баҳона яратаётганликда айблади.

Гавана кўчаларида айрим аҳоли вакиллари мамлакат оғир иқтисодий инқирозга қарамай, ҳар қандай ҳужумга қарши курашишга тайёр эканини билдирди.

57 ёшли Сандра Росо шундай деди: “Мен Куба кучли мамлакат эканини биламан. Кубаликлар жуда жасур. Агар улар келса, жанг қилишларига тўғри келади, чунки Куба жавоб қайтаради.”

Вашингтон билан ўнлаб йиллардан бери зиддиятда бўлиб келаётган коммунистик Куба сўнгги ойларда янада қаттиқ босим остида қолди. АҚШ Венесуэла етакчиси ҳибсга олинганидан кейин оролга энергия таъминотини қисқартирди. Натижада мамлакатда ёқилғи танқислиги юзага келди ва электр таъминоти кўп жойларда кунига атиги бир-икки соатгача чекланди.

Сўнгги кунларда икки давлат ўртасидаги таранглик янада кучайди. Reuters агентлиги ўтган ҳафта АҚШ Адлия вазирлиги собиқ Куба раҳбари Раул Кастрога нисбатан 1996 йилда гуманитар ташкилот самолётлари уриб туширилгани бўйича айблов тайёрлаётганини хабар қилган эди.

Куба ташқи ишлар вазири Бруно Родригес эса мамлакат БМТ Низоми ва халқаро ҳуқуққа мувофиқ ташқи тажовуздан ҳимояланиш ҳуқуқига эга эканини таъкидлади.

“АҚШнинг Кубага бостириб кириши ҳам, Кубанинг АҚШга ҳужум қилиши ҳам тўғри эмас. Улар келишувга эришиши, гаплашиши ва музокара қилиши керак,” деди у.

94 ёшли Раул Кастрога қарши эҳтимолий айблов эълон қилиниши Трамп маъмуриятининг Кубага нисбатан босимини кескин кучайтириши мумкин. Раул Кастро 1959 йилги Куба инқилобининг асосий иштирокчиларидан бири ва марҳум Фидел Кастронинг укаси ҳисобланади.

87 ёшли Хорхе Вильялобос эса шундай деди: “Куба халқи ҳеч кимнинг ўз ерига аралашишига йўл қўймайди. Кубаликлар ҳатто таёқ ва тош билан ҳам ўзини ҳимоя қилишни билади.”