Конго Демократик Республикасида Эбола эпидемияси оқибатида вафот этганлар сони 4 мингдан ошди.

Эбола ўткир ва оғир кечадиган юқумли вирусли касаллик бўлиб, одамдан одамга асосан беморнинг қони ва бошқа биологик суюқликлари орқали юқади. Касаллик юқори ҳарорат, кучли ҳолсизлик, бош ва мушак оғриғи, қусиш ва ич кетиши каби аломатлар билан бошланиши мумкин. Оғир ҳолатларда ички ва ташқи қон кетиши кузатилади.

Конгода эпидемияни назоратга олиш ишлари янада қийинлашяпти. Эбола тарқалган ҳудуддаги транзит лагерларидан бири ёқиб юборилди ва оқибатда 19 мингга яқин одам ҳудудни тарк этди.

Аҳолининг оммавий кўчиши касалланганлар ва улар билан мулоқотда бўлган шахсларни аниқлаш ҳамда назорат қилишни қийинлаштирди. Бу эса вируснинг бошқа ҳудудларга тарқалиши хавфини оширяпти.

Айни пайтда Конго расмийлари ва тиббиёт ходимлари Эбола тарқалишини тўхтатиш чораларини кучайтирмоқда.