Қаёққа қарама разолат, қоронғулик ва абсурд. Россия ҳукумати расмий рухсатномага эга япон журналистни қамаб қўйди. АҚШ ҳукумати эса Трамп танқидчиси бўлган конгресс аъзоси (депутат)нинг уйига бостириб кирди.

АҚШ ҳуқуқни муҳофаза қилувчи органлари президент Дональд Трампнинг ашаддий танқидчиларидан бири, Конгресс Вакиллар палатаси аъзоси Илҳон Умарнинг уйида тинтув ўтказди. Бу ҳақда BBC хабар берди.

Тинтув 12 октябрь, душанба куни, АҚШдаги оралиқ сайловларга 22 кун қолганида амалга оширилди.

Ҳозирча жиноий терговнинг аниқ тафсилотлари ошкор этилмаган. Fox News телеканали ўз манбаларига таяниб, тинтув иммиграция ҳужжатларини эҳтимолий қалбакилаштириш бўйича тергов билан боғлиқлигини маълум қилди.

Илҳон Умар эса ушбу ҳаракатларни сиёсий қўрқитишга уриниш деб атаб, Дональд Трампни айблаган.

Сомалида туғилган Илҳон Умар 2018 йилда АҚШ Конгресси Вакиллар палатасига сайланган сомалилик келиб чиқишга эга биринчи америкалик аёл. У Миннесота штатининг Миннеаполис шаҳрини ҳам қамраб олган 5-сайлов округи вакили ҳисобланади. 2024 йилги сайловда у 74 фоиз овоз билан қайта сайланган.

Умар Дональд Трамп сиёсати ва Исроил ҳукумати ҳаракатларини мунтазам танқид қилиб келади. Трамп ҳам бир неча бор конгрессвуменнинг келиб чиқишига оид кескин фикрларни билдирди.